Ջորկաեֆից մինչև Ռիվալդո, Հայաստանում ֆուտբոլային տոն է սպասվում

Հուլիսի 6-8  Աշխարհի առաջնությանը նվիրված  միջոցառումներ կլինեն  նաև Երևանում։ Հայաստանում տեղի կունենա լեգենդար ֆուտբոլիստների միջև խաղ` Եվրոպան ընդդեմ Լատինական Ամերիկայի:

Միջոցառումները նախաձեռնել է  գործարար, «Փյունիկ» ակումբի սեփականատեր Արթուր Սողոմոնյանը: 

Լրագրողների հետ զրույցում Արթուր Սողոմոնյանը նշեց, որ Խորեն Հովհանիսյանին նվիրված խաղից հետո շատ ջերմ տպավորություններ կային և ցանկություն կար, որ դա չլինի վերջին նմանատիպ խաղը:

«Միջոցառման նպատակը Աշխարհի առաջնությունը Ռուաստանից երեք օրով Հայաստան բերելն է: Կլինի նաև ֆան-գոտի»,-ասաց Սողոմոնյանը` հույս հայտնելով, որ հայաստանյան երկրպագուները անձամբ կզգան ֆուտբոլային տոնը:

Ֆան գոտին տեղի կունենա հուլիսի 6-8-ը, իսկ ֆուտբոլային լեգենդների միջև խաղը նախատեսված է հուլիսի 8-ին:

Սողոմոնյանը նշեց նաև, որ օրը պատահական չի ընտրվել: Այդ օրն Աշխարհի առաջնությունում խաղեր չեն լինի և այս խաղը հետաքրքրություն կառաջացնի ոչ միայն Հայաստանում:

Ֆան-գոտիներում նախատեսում է նաև մինի ֆուտբոլային խաղերը` լեգենդների և Հայաստանի միջև: Սողոմոնյանի խոսքով միջ այդ կհայտարարվի մրցույթ, որպեզի  բոլոր հնարավորություն ունենան մասնակցել այդ մինի-խաղերին:

Խաղերը կմեկնաբանեն Ռուսաստանից հրավիրված մեկնաբաններ:

Այն դիտարկմանը, թե ինչո՞ւ չեն լինելու հայ մեկնաբաններ, Սողոմոնյանը հավելեց, որ կքննարկվի նաև այդ հարցը:

Հուլիսի 8-ին Հայաստանում կայանալիք խաղին կմասնակցեն Ռիվալդոն, Հերնան Կրեսպոն, Գաբրիել Բատիստուտան, Դիդան, Կաֆուն, Իվան Սամորանոն, Ժուլիանո Բելետին, Սերժինիոն, Պաոլո Մալդինին, Յուրի Ջորկաեֆը, Յարի Լիտմանենը, Հրիստո Ստոիչկովը, Դեմետրիո Ալբերտինին, Լյուդովիկ Ժուլին, Կախա Կալաձեն, Ռայան Գիգսը և այլք:

Սողոմոնյանի խոսքով, բանակցություններ են ընթանում Տոտիի, Ռոբերտո Կառլոսի հետ: