Նիկոլ Փաշինյանի «շտապ օգնությունը» Բակո Սահակյանին

Վերլուծական 7 Հուլիս, 2018 20:29

Վարչապետի մամուլի քարտուղար Արման Եղոյանը տեղեկացրել է, որ Նիկոլ Փաշինյանը շտապ իր մոտ է կանչել ՀՀ ռազմական տեսուչի նորանշանակ տեղակալ Միքայել Արզումանյանին՝ բացատրություններ ստանալու։ Բանն այն է, որ հունիսի 27-ին Փաշինյանի որոշման համաձայն՝ ՀՀ ռազմական տեսուչի տեղակալի պաշտոնում նշանակված գեներալ-մայոր Միքայել Արզումանյանը մի քանի օր է, ինչ Արցախում է: Որոշ տեղեկությունների համաձայն, Արզումանյանը փորձում է համախմբել ազատամարտիկներին՝ կազմակերպելով շարժում, որով գլխավոր պահանջը ԱՀ նախագահ Բակո Սահակյանի հրաժարականն է:

Ի դեպ՝ այս տարվա փետրվարի 7-ին Արցախի Հանրապետության նախագահ Բակո Սահակյանը հրամանագիր էր ստորագրել գեներալ-մայոր Միքայել Արզումանյանին Արցախի Հանրապետության պաշտպանության բանակի հրամանատարի տեղակալի պաշտոնից ազատելու մասին: Այնուհետև վերջինս տեղափոխվել էր Հայաստան՝ դառնալով Սերժ Սարգսյանի գլխավոր ռազմական տեսուչ Միքայել Հարությունյանի տեղակալը: Դեռևս այն ժամանակ շատերն էին փորձում հասկանալ, թե ո՞րն էր Արզումանյանին Արցախից «հեռու պահելու» իրական նպատակը: Այսօր տեղի ունեցող զարգացումները որոշակի լույս են սփռում այդ հարցի վրա: Թերևս Արցախի իշխանություններն արդեն այն ժամանակ էին նկատել Արզումանյանի քաղաքական նկրտումները և փորձել էին ապահովագրվել հնարավոր ռիսկերից:

Ստեղծված իրավիճակը մեկ անգամ ևս ապացուցում է, որ վարչապետ Փաշինյանին մինչ օրս չի հաջողվում ամբողջությամբ վերահսկողություն հաստատել ՊՆ նկատմամբ. Գուցե դա է պատճառը, որ Արզումանյանի դեպքն այսչափ հանրայնացնում է՝ կասկած չկա, որ բացատրություններ Փաշինյանը կարող էր ստանալ նաև տետ-ա-տետ՝ առանց խնդրին հնչեղություն հաղորդելու: Սական Փաշինյանի՝ նման օպերատիվ արձագանքն իր թիկունքում տարվող խաղերին նաև ուղերձ էր մյուսներին, այդ թվում՝ գեներալիտետին: Չի բացառվում, որ Արզումանյանի արցախյան գործուղումները կազմակերպված են հենց գեներալների կողմից և Փաշինյանի կտրուկ արձագանքը միտված է հենց նման զարգացումները կանխելուն: Բացի այդ, սա հերթական օգնությունն է Բակո Սահակյանին: Այսպես՝ Փաշինյանը ցանկանում է ապացուցել, որ Արցախի նախագահին անվերապահ աջակցություն ցուցաբերելու նրա հայտարարությունները պարզապես հայտարարություններ չէին:

Ստելլա Խաչատրյան