Արմեն Սարգսյանի՝ հայրենասիրության բանաձևը

Պետք է հպարտ լինեք, որ հայ եք, որովհետև, եթե նայեք մեր ժողովրդի պատմությանը, ապա հպարտանալու շատ առիթներ կունենաք։ Այս մասին հուլիսի 7-ին Ծաղկաձորում «Դեպի Հայրենիք, դեպի Սուրբ Էջմիածին» համահայկական երիտասարդական հավաքի մասնակիցներին ասաց ՀՀ նախագահ Արմեն Սարգսյանը։

«Հայաստանում տեղի ունեցած վերջին իրադարձությունները պետք է ձեր հպարտությանը ևս մեկ կաթիլ ավելացնեն, որովհետև աշխարհում եզակի ազգեր ու պետություններ կան, որոնք կարողացել են հեղափոխություն իրականացնել առանց մեկ կաթիլ արյան»,- նշեց նախագահը։

Հավաքը կազմակերպվել է Հայ առաքելական եկեղեցու կողմից։ Հայաստանից, Արցախից ու Սփյուռքից շուրջ 400 երիտասարդներ հնարավորություն են ունեցել հայրենիքում մասնակցել ուխտագնացության։ Նախագահ Արմեն Սարգսյանը երիտասարդներին հորդորեց կրոնական ընտրություն կատարելիս առաջնորդվել խղճի ազատությամբ, բայց հիշել, որ Հայ առաքելական եկեղեցին պարզ եկեղեցի չէ։

«Բոլորս ազատ ենք, յուրաքանչյուրդ ընտրության հնարավորություն ունեք՝ լինել հավատացյալ կամ աթեիստ, բայց դրանով չեք դադարում հայ լինելուց։ Հիմնական խնդիրն ու գեղեցկությունը հենց նրա մեջ է, որ դուք, հիմնվելով ձեր խղճի վրա, ազատ ընտրություն եք կատարում։ 700 տարի մենք մեծացել ու հպարտ հայեր ենք դարձել Հայ առաքելական եկեղեցու շնորհիվ։ Եկեղեցին դարեր շարունակ պահել ու պահպանել է մեր պետականությունը»,- ասաց Արմեն Սարգսյանը։

Հարցուպատասխանի ընթացքում Սփյուռքում ապրող երիտասարներն Արմեն Սարգսյանին խնդրեցին նշել, թե ինչ հնարավորություններ կան հայրենիք վերադառնալու ու Հայաստանում սեփական բիզնեսը սկսելու համար։ Նախագահ Արմեն Սարգսյանն ասաց, որ իրողություն է փոխվել ու այժմ դրա համար շատ բարենպաստ պայմաններ կան։

«Այսօր կա կառավարություն, որը ոչ միայն հայտարարել է, այլ նաև իրագործում է հիմնական կարևոր սկզբունքը՝ պայքար կոռուպցիայի դեմ։ Դատարաններն ու մյուս պետական կառույցներն են ավելի արդար դարձել, և հենց այս փոփոխություններն են ձեզ հնարավորություն տալիս ձեր հայրենիքում ձեր սիրած գործով զբաղվել»,- նշեց նախագահ Արմեն Սարգսյանը։ Հանդիպման ընթացքում նախագահը երիտասարդներին հիշեցրեց նաև հայրենասիրության իրական խորհրդի մասին։

«Հայրենասիրությունը միայն խոսքեր ու կենացներ չէ, նույնիսկ պատերազմի ժամանակ հայրենիքը պաշտպանելը չէ։ Հայրենասիրությունն այս խաղաղության պայմաններում երկրին նվիրվելն է»,-ասաց նախագահը։ Արմեն Սարգսյանը համահայկական հավաքի սփյուռքահայ մասնակիցներին հորդորեց գալ Հայաստան, ազգային ժառանգությունը պահպանելով, հզորացնել երկիրը։