Գորիսի ավանդական ուտեստները զբոսաշրջիկներին ներկայացվեցին մեկ հարթակում

«Գորիսն ԱՊՀ երկրների մշակութային մայրաքաղաք» ծրագրի շրջանակում քաղաքը տեղացիներին և զբոսաշրջիկներին է ներկայանում բազմաբնույթ միջոցառումներով`հանրահռչակելով Սյունիքի հարուստ մշակութային ժառանգությունը: Այդ իրադարձությունների կարևոր մասն է կազմում ավանդական ուտեստների հյուրասիրություն-փառատոնը, որն անցկացվեց հուլիսի 8-ին Ակսել Բակունցի տուն-թանգարանի բակում և դրա տարածքում:

Հյուրերին դիմավորեց թանգարանի տնօրեն Վարդան Սարգսյանը, ով, ողջունելով ներկաներին, փաստեց, որ քաղաքին նվիրված տոնակատարությունը սկսվում է թանգարանից: «Պետք է շեշտեմ, որ «Բակունցյան օրեր» տոնակատարությունների շրջանակում թանգարանի այգին համալրվել է մի քանի ծառաքանդակներով, որոնց հեղինակը նկարիչ, քանդակագործ Ժիրայր Մարտիրոսյանն է»,-նշեց նա:

Թանգարանից դուրս գալով` միջոցառման մասնակիցները շրջեցին Գորիսի փողոցներով, որտեղ գորիսեցիների կողմից պատրաստված ավանդական ուտեստներով ճոխ սեղանները սպասում էին նրանց:

«Մենք յուրահատուկ թթու ենք պատարստում. օրինակ` այստեղ ներկայացնում ենք բոխու և շուշանի թթու: Մեր հյուրերն այս թթուները շատ են հավանում: Սիրում են նաև մեր մատուցած լոբին, տարբեր հատապտուղներից պատրաստված օղիները»,- ասաց Գենավարդ Պետրոսյանը: Ասյա Գասպարյանն էլ խոստովանեց, որ ջանք ու եռանդ չեն խնայել, որ իրենց պատրաստած ուտեսները ամենհամեղն ու տարբերվողը լինեն: «Մի քանի տեսակ աղցաններ և դանդուռով,  սխտորով թթուներ ենք պատրաստել, իսկ սեղանի ամենաբնորոշ ուտեստը Գորիսի մեղրն ու թփով տոլման է»,-հպարտորեն ներկայացրեց տիկին Ասյան:

Գորիսում ավանդույթ է պահպանել ավանդական ուտեստները: Իննսունամյա Գոհար Հասրաթյանը վստահեցրեց, որ երիտասարդ ընտանիքները շարունակում են պատրաստել այն ճաշատեսկները, որոնք ինքը եփել է երիտասարդ տարիներին:

Համագործակցության մշակութային մայրա­քաղաքներ» միջպե­տա­կան ծրագրի կանոնակարգով, Հայաստանը 2016 թվականի դեկ­տեմբերին ԱՊՀ գործադիր կոմիտեին առաջարկություն էր ներկայացրել՝ Սյունիքի մարզի Գորիս համայնքը 2018 թվա­կանի ԱՊՀ մշակութային մայրաքաղաք հայտարարելու վերաբերյալ:

Հայաստանի արտաքին գործերի նախարար Էդվարդ Նալբանդյանը 2017 թվականի ապրիլի 7-ին Տաշքենդում մասնակցել և ելույթ է ունեցել ԱՊՀ ԱԳ նախարարների խորհրդի նիստին:

Հենց այս օրը արտգործնախարարների խորհուրդը որոշել է հավանություն տալ Հայաստանի Գորիս քաղաքը որպես 2018 թվականին ԱՊՀ մշակութային մայրաքաղաք հռչակելու մասին որոշման նախագծին։