Այս կառավարության ամենամեծ թերությունն այն է, որ նա ամբողջ մասնագիտական կազմը դուրս է թողել կառավարման համակարգից. բնապահպան

Բնության և կանաչ գոտիների պահպանումը օրակարգային խնդիրներից է Հայաստանում, սակայն, չնայած սրան, վերջերս Հարկային օրենսգրքում տեղի են ունեցել փոփոխություններ՝ ավտոմեքենաներից շրջակա միջավայր արտանետվող վնասակար նյութերի համար գանձվող բնապահպանական հարկի դրույքաչափերը մինչև երկու անգամ նվազելու վերաբերյալ: ԼՈւՐԵՐ.com-ի հետ զրույցում բնապահպան Սիլվա Ադամյանը նշեց, որ դրույքաչափերը պետք է չիջեցվեր, կամ գոնե հին և նոր մեքենաների համար տարբեր դրույքաչափեր հաստատվեին:

«Մեզ մոտ մասսայական դրույքաչափն են իջեցրել, բայց մենք ունենք լուրջ  խնդիր օդի աղտոտման հետ կապված: Քաղաքի աղտոտումը առանց այդ էլ շատ լուրջ խնդիր է: Մեծ քանակությամբ մեքենաներ են ներկրվում և հիմնականում երկար տարիներ օգտագործված: 20 տարվա մեքենայի արտանետումը չի կարող համեմատվել թարմ մեքենայի արտանետումների հետ: Մենք ունենք լուրջ խնդիր: Կառավարությունը ճիշտ որոշում չի ընդունել, ես հասկանում եմ, որ ամեն ինչ անում են, որ քաղաքացին չդժգոհի, քաղաքացու գրպանը չմտնեն, սակայն օրենք փոխելիս պետք է լուրջ մտածել և խոսել բնապահպանների և կոնկրետ մասնագետների հետ, ինձ թվում է՝ այս դրույքաչափերի իջեցումը լուրջ վնաս է հասցնելու շրջակա միջավայրին, և բացի դրանից՝ խթանում է հին մեքենաների ներկրմանը»,-ասաց Ադամյանը:

Նա նշեց, որ պետք է ստուգումներ անցկացվեն, և առանց դրա կառավարության կողմից օրենք փոխելն անհեռատես քայլ է եղել:

«Այս կառավարության ամենամեծ թերությունն այն է, որ նա ամբողջ մասնագիտական կազմը դուրս է թողել կառավարման համակարգից և դրա համար մենք ունենք այսպիսի լուրջ խնդիրներ»,-նկատեց բնապահպանը:

Մեքենաների տեխզննմանն անդրադառնալով՝ Սիլվա Ադամյանը նշեց, որ ՀՀ-ում կա մեծ բացթողում այդ հարցով, քանի որ մեքենաները որևէ զննում չեն անցնում:

«Տեխզննում ասվածը միայն թուղթ ստորագրելն է: Ստորագրում ես, վճարում և վերջ՝ դու տեխզննում ես անցել»,-հավելեց Ադամյանը:

Բնապահպանն առաջարկում է մարդկանց տեղեկացվածության մակարդակը բարձրացնել շրջակա միջավայրի և բնության վրա իրենց ազդեցության հետևանքների վերաբերյալ, որի լավագույն միջոցը նա համարեց սոցիալական հոլովակների պատրաստումն ու տարածումը: