«Philip Morris International»-ն աջակցում է Հայաստանի լավագույն երիտասարդ գիտնականներին

Երևանի պետական համալսարանը (ԵՊՀ) և Ձեռնարկությունների Ինկուբատոր Հիմնադրամը (EIF) Philip Morris International-ի (PMI) աջակցությամբ ներկայացնում են «Տվյալների գիտությունը բիզնեսում» համատեղ մագիստրոսական ծրագիրը: Այս կապակցությամբ մեծ միջոցառում էր կազմակերպվել, որի ընթացքում ծրագրի լավագույն 10 ուսանողները հնարավորություն ստացան մասնակցելու 2017-2019 և 2018-2020 շրջափուլերին։

Շուրջ մեկ տասնամյակ է, ինչ «Philip Morris International»-ը փոխակերպվում է՝ դառնալով  տեխնոլոգիական ընկերություն, որն իրականացնում է առաջադեմ հետազոտություններ` առանց ծուխ արտադրանքի պորտֆել ստեղծելու համար: Ընկերությունը համագործակցում է համաշխարհային համբավ վայելող շուրջ 430 գիտնականների, ինժեներների և փորձագետների հետ, որոնց բեղուն աշխատանքը հանգեցրել է ավելի քան 2900 հաստատված արտոնագրերի և հաստատման փուլում գտնվող շուրջ 4600 արտոնագրերի։

Միջոցառմանը Ձեռնարկությունների Ինկուբատոր Հիմնադրամի, Երևանի պետական համալսարանի և Կրթության և գիտության նախարարության ներկայացուցիչները հայտնեցին իրենց պատրաստակամությունը կիրառել կրթություն-ինդուստրիա մոդելը նոր մագիստրոսական ծրագրի միջոցով։ Այն հնարավորություն կտա ուսանողներին դառնալ աշխարհում տեղի ունեցող տվյալների հեղափոխության մաս՝ ստեղծելով կամուրջ տվյալների գիտության տեսական գիտելիքների և մասնավոր հատվածի պահանջների միջև։ Կրթաթոշակները թույլ կտան ուսանողներին շարունակելու ուսումնասիրությունները իրենց ոլորտում, որը ներառում է մեծածավալ տվյալների վերլուծություն, մեքենայական ուսուցում, տվյալների կառավարում՝ օգտագործելով Ձեռնարկությունների Ինկուբատոր Հիմնադրամի կողմից տրամադրվող ռեսուրսները։

Լրագրողների հետ զրույցում PMI-ի ապրանքագիտական և մտավոր սեփականության գծով տնօրեն Լուկա Ռոսսին՝  նշեց. «PMI-ը տեխնոլոգիապես փոխակերպվում է, որպեսզի ստեղծի նորարարական՝ առանց ծուխ արտադրանք։ Փոխակերպման ճանապարհին մենք գիտակցում ենք կրթական ծրագրերի աջակցման և տաղանդների զարգացման կարևորությունը տեխնոլոգիական այնպիսի երկրում, ինչպիսին է Հայաստանը»,- ընդգծեց նա։

«Ֆիլիպ Մորրիս Արմենիա»-ի կորպորատիվ հարցերի, գիտական ներգրավման ու ինովացիաների գծով կառավարիչ Վահե Դանիելյանն էլ նկատեց՝ իրենք չէին կարող անմասն մնալ նման նախաձեռնությունից. «Մենք հավատում ենք Հայաստանի տեխնոլոգիական և գիտական ապագային, որը նաև վարկանիշային է մեր երկրի համար: Մեր նպատակն է գիտահետազոտական համագործակցության շրջանակում ձևավորել այն էկոկրթական համակարգը, որը անհրաժեշտ է նաև ապագայում արդյունքներ ունենալու համար։ Այսօր մենք հավաքվել ենք էկոհամակրգի զարգացմանը միտված միջոցառումներից մեկի շրջանակներում՝ տվյալագիտության մագիստրատուրայի ծրագրի շնորհանդեսին: «Ֆիլիպ Մորրիս» ընկերության աջակցության շնորհիվ ֆինանսավորում է ստանում 10 լավագույն ուսանող: Բացի այդ, ոչ միայն ուսանողների կրթական ծրագրերի փոխհատուցում է իրականացվում, այլև համագործակցություն ամբողջ կրթական ծրագրի շրջանակներում: Այստեղ պետք է լինի մրցակցություն, որպեսզի լավագույն ուսանողները մրցեն միմյանց հետ»,- ասաց Դանիելյանը՝ նշելով, որ հետագայում համագործակցությունն ընդլայնվելու է:

«Չափազանց ոգևորված ենք հայ տաղանդավոր երիտասարդ գիտնականներին համաշխարհային հեղինակություն վայելող և իրենց ոլորտներում առաջատար գիտնականների հետ շփման հնարավորություն ընձեռելով», - ընդգծեց «Ֆիլիպ Մորրիս Արմենիա»-ի գլխավոր կառավարիչ Նատալյա Մայորովան։

Նշենք, որ միջոցառման մաս էր կազմում կրթաթոշակների հանձնման արարողությունը, որի ընթացքում լավագույն ուսանողները ստացան կրթաթոշակի հավաստագրեր, ինչպես նաև կիսվեցին իրենց առաջիկա պլաններով՝ մասնագիտական կարիերայի հնարավորությունների վերաբերյալ։

Պարգևատրված ուսանողներից Սուրեն Երիցփոխյանը նախևառաջ շնորհակալություն հայտնեց ծրագրի կազմակերպիչներին, ապա մեծ ոգևորությամբ նշեց. «Ծրագրին դիմելիս շատ սպասումներ ունեի, որոնցից առաջնահերթը պրակտիկ գիտելիքներ ստանալն էր: Թեև Հայաստանում տեսական գիտելիքներ ստանում ենք, սակայն գործնական կիրառությունը չգիտենք: Սպասումներիս մեծ մասն իրականացավ, հույս ունեմ, որ մյուս մասն էլ հաջորդ տարվա ընթացքում կիրականանա»,- հուզմունքը թաքցնել չկարողանալով՝ նշեց ուսանողը:  

Միջոցառմանը տվյալների գիտության էկոհամակարգի զարգացման վերաբերյալ ելույթներով հանդես եկան Լուկա Ռոսսին (Ապրանքագիտական և մտավոր սեփականության գծով տնօրեն, «Philip Morris International»), Վահե Դանիելյանը (Կորպորատիվ հարցերի, գիտական ներգրավման ու ինովացիաների գծով կառավարիչ, «Ֆիլիպ Մորրիս Արմենիա»), Ռուբեն Գևորգյանը, («Տվյալների գիտությունը բիզնեսում» մագիստրոսական ծրագրի ղեկավար, ԵՊՀ), Բագրատ Ենգիբարյանը (տնօրեն, Ձեռնարկությունների Ինկուբատոր Հիմնադրամ)։ Վերջիններս խրախուսեցին նոր կրթական ծրագրերի նախաձեռնությունների զարգացումը, հայտնեցին պատրաստակամություն՝ աջակցելու գիտական և կրթական էկոհամակարգի հետագա զարգացմանը՝ խթանելով Հայաստանի բուհերի և հետազոտական ​​հաստատությունների զարգացումը:

Հիշեցնենք՝ Գիտական և տեխնոլոգիական ասպարեզում երկրի փորձառությամբ պայմանավորված, 2017թ.-ին  «Ֆիլիպ Մորրիս»-ը կնքեց փոխըմբռնման հուշագրեր ՀՀ կառավարության,  Հայաստանի ազգային պոլիտեխնիկական համալսարանի և Երևանի պետական համալսարանի հետ՝ ընդգծելով ընկերության մտադրությունը Հայաստանում  «Ֆիլիպ Մորրիս»-ի գիտահետազոտական կենտրոնի ստեղծելու, ինչպես նաև կրթական և հետազոտական ծրագրերին աջակցելու ուղղությամբ՝ ներառյալ մագիստրոսական և ասպիրանտական գիտական ծրագրերը:

2008թ.-ից ի վեր Philip Morris International -ը կատարել է ավելի քան 4.5 մլրդ ԱՄՆ դոլարի ներդրում հիմնարար հետազոտությունների, առանց ծխի արտադրանքերի պորտֆելի մշակման, գիտական հիմնավորման և արտադրանքի կատարելագործման մեջ: 

«Ֆիլիպ Մորրիս Արմենիա»-ն Philip Morris International առաջատար միջազգային ծխախոտային ընկերության դուստր ձեռնարկությունն է: Philip Morris International -ը Հայաստանում ներկայացուցչություն է ստեղծել 1995թ.-ին և 2010թ.-ի դեկտեմբերին բացել է «Ֆիլիպ Մորրիս Արմենիա» ՍՊԸ-ն: