Շոգ է. ի՞նչ անել

Եղանակների տաքանալուն զուգահեռ՝ գերծանրաբեռնված աշխատում է շտապօգնությունը: Այս տարվա աննախադեպ շոգերի հետ կապված՝ սրվել են սիրտ-անոթային, սուր շնչառական, մյուս օրգանների քրոնիկ հիվանդությունները: Այս մասին լրագրողների հետ հանդիպմանն ասաց «Շտապօգնություն» ՓԲԸ տնօրեն Թագուհի Ստեփանյանը:

Նա նշեց, որ 2017 թվականի համեմատությամբ այս ամիս կանչերի թիվն ավելացել է 1498-ով, իսկ շտապօգնության մեքենաները՝ կանչերի մեծ թվով պայմանավորված՝ երբեմն չեն հասցնում արագ արձագանքել կանչերին, ինչն էլ դժգոհությունների առիթ է դառնում: Թագուհի Ստեփանյանը նկատեց նաև, որ չնայած բարձր ջերմաստիճանին արևահարության դեպքերը նվազել են:

Սրտաբան Մարինե Օրդյանը նկատեց, որ շոգ եղանակին մարդու քրտնարտադրությունն ավելանում է, որի հետևանքով մարդը ջրազրկվում է, քրտինքի հետ օգտակար նյութերը դուրս են գալիս, ինչն ավելացնում է ինֆարկտի և ինսուլտի հավանականությունը:

«Եթե ջերմաստիճանը բարձրանում է  նույնիսկ 30 աստիճան, դա համազոր է, որ մարդը կատարում է միջին ծանրության ֆիզիկական աշխատանք, իսկ եթե 30 կամ ավելի ջեմաստիճանով բարձր է, մարդ կորցնում է 6-8 լիտր քրտինք, որոնց հետ նաև կարևոր հանքանյութեր: Դա պետք է վերականգնվի: Մարդիկ պետք է շոգ եղանակին շատ ջուր օգտագործեն կամ դրան փոխարինող՝ հանքային ջուր, թան, բայց առանց աղի, որպեսզի հեղուկը մնա օրգանիզմում»,-ասաց Օրդյանը:

Նա խորհուրդ տվեց ժամը 12:00-ից 15:00-ն առանց հիմնավոր պատճառի տնից դուրս չգալ, զերծ մնալ ֆիզիկական ակտիվությունից, իսկ տնից դուրս գալիս կրել  թեթև հյուսվածքից զգեստներ, չօգտագործել ալկոհոլ, որը սրտի ռիթմի խանգարում կարող է առաջացնել: