Գառնի համայնքում խմելու ջուր չկա․ բնակիչներն ահազանգում են

Կոտայքի մարզի Գառնի համայնքի որոշ թաղամասերում արդեն մեկ ամսից ավելի է՝ խմելու ջուր չկա։ Բնակիչները դիմել են համայնքապետարան, մարզպետարան, բայց դեռ որևէ արձագանք չի եղել։

«Ներքևի թաղամասից մոտ 30-40 տնտեսություն, մեկ ամսից ավելի է, գոնե մեկ ժամով ջուր չեն ունեցել։ Մեքենա ունեցողները գյուղի ձորից, աղբյուրներից մեքենաներով ջուր են բերում, իրար փոխանցում, իսկ ովքեր մեքենաներ չունեն՝ հին սայլերով են բերում։ Այս 45 աստիճան տապին առանց ջուր հնարավոր չէ»,-ասաց բնակիչներից մեկը։ 

Նրանք նկատեցին, որ նախկինում այսպիսի խնդիր եղել է, սակայն ոչ այսքան երկար ժամանակով։ Այժմ գյուղի միայն կենտրոնական հատվածում և մեծահարուստների՝ «դաչնիկների» տներում մշտական ջուր կա։ Իսկ իրենք իրենց անձնական հիգիենայի և լողանալու խնդիրները հոգում են կենտրոնական թաղամասում կամ Երևանում բնակվող իրենց հարազատների բնակարաններում։

Բնակիչներից մեկը նշեց, որ իրենց խմելու ջուր մատակարարող ընկերության աշխատակիցները մեկնաբանել են, որ խնդիրը կապված է ոռոգման ջրերի հետ՝ այնտեղ աշխատանք են կատարել, որի ընթացքում վնասվել են խմելու ջրի խողովակները։ Բնակիչները 20 օր առաջ դիմել են գյուղապետին, և նա ասել է, որ 5 օրվա ընթացքում ջրի խնդրին լուծում կտրվի, սակայն մինչ այժմ որևէ պատասխան չեն ստացել։ 

Նրանք ակնկալում են՝ օրվա մեջ գոնե 2 ժամով իրենց ջուր տրամադրեն, որպեսզի կարողանանան հավաքել՝ իրենց առօրյա խնդիրները հոգալու համար։