«Հուսո առագաստ-2018»-ը հասնում է բաց ծով…
Գիտություն և Մշակույթ
«Սիվիլ արտ» մշակութային հասարակական կազմակերպությունը «Բարդերի ակումբ» ստեղծագործական միավորման հետ համատեղ 4-րդ տարին անընդմեջ անց է կացնում հեղինակային երգի միջազգային փառատոն:
Ինչպես նշում են «Հուսո առագստ -2018»-ի կազմակերպիչները, փառատոնի հիմնական նպատակը ոչ միայն սկսնակ հեղինակ-կատարողներին հայտնաբերելը, նրանց ստեղծագործական գործունությունը խթանելն ու բեմ տրամադրելն է, այլև մշակութային միջավայր ստեղծելն ու բարդ ժանրի սիրահարների և երգահանների միջև շփում ապահովելն է։
Մոտ մեկ ամիս շարունակ տևած փառատոնային հետաքրքիր ու լարված անցուդարձն աստիճանաբար մոտենում է իր՝ անչափ սպասված ու տոնական ավարտին: Փառատոնն ընթանում է 2 փուլով՝ նախընտրական և համերգային:
Առաջին փուլն արդեն կայացել է: Փառատոնի խստապահանջ ժյուրիի կազմը լսել է նախապես հայտադիմումներ լրացրած մասնակիցներին և ընտրել 2018-ի «Լավագույն տասնյակը», ովքեր իրենց ելույթներով կներկայանան հաջորդ՝ համերգային փուլին։ Նշենք նաև, որ փառատոնի շրջանակում նրանց մասնակցության ու կեցության հարցերը հոգում են փառատոնի կազմակերպիչները։
Համերգային փուլը հուլիսի 20-22-ը տեղի կունենա Գեղարքունիքի մարզում՝ Շորժա գյուղին հարակից «WishUp» լողափում։ Եռօրյա տոնի ընթացքում վրանային փոքրիկ քաղաքում կկազմակերպվի հեղինակային երգի համերգաշար, որը կամփոփվի հավաստագրերի, շնորհակալագրերի և խորհրդանշական նվերների հանձնման հանդիսավոր արարողությամբ: Գալա համերգի ընթացքում «Լավագույն տասնյակ» անվանակարգին արժանացած նորեկները նույն բեմում ելույթ կունենան բարդ ժանրի մի քանի սերունդների՝ արդեն անվանի ու սիրված հեղինակ- կատարողների հետ։ Եվ այս ամենը տեղի կունենա մեծ ու սրտեր ջերմացնող գեղեցիկ խարույկի շուրջ:
Երկրորդ տարին է՝ փառատոնի համերգային մասին են մասնակցում նաև Հայաստան ժամանած արտերկրյա հյուրեր՝ հեղինակ-կատարողներ։ Մայրաքաղաքի աղմուկից, անցուդարձից ու տապից տասնյակ կիլոմետրեր հեռու կազմակերպվող այս եռօրյա հեքիաթը իսկական նվեր է ոչ միայն ժանրի սիրահարների, այլև անմիջականությունն ու անկեղծությունը գնահատողների համար:
ՈՒՂԻՂ ԵԹԵՐ
Ամենադիտված 
Նորայրը մեկնել էր հանգստի, արդեն վերադառնում է. նոր մանրամասներ՝ ողբերգական դեպքից
