Ինչպես է անվնաս հայտնվել այնտեղ, երբ ամբողջ տարածքը մինապատված է. Բերդավանի գյուղապետ

ՀՀ Տավուշի մարզի Բերդավան գյուղի բնակիչ Կարեն Ղազարյանը դեռևս անհայտ հանգամանքներում հայտնվել է Ադրբեջանի տարածքում: Բերդավանի համայնքապետ Սմբատ Մուղդուսյանը  ԼՈւՐԵՐ.com-ի թղթակցի հետ զրուցում պատմեց, որ Կարեն Ղազարյանի տունը գյուղի ծայրամասում է գտնվում, վերջին տունն է և մոտ է սահմանին:

«Նրանց տնից Ադրբեջանական գյուղն ավելի մոտ է, քան հայկականը: Բայց, միևնույն է, չեմ հասկանում՝ ինչպես է անվնաս հայտնվել այնտեղ, երբ ամբողջ տարածքը մինապատված է: Այժմ Կարենենց տանն ենք, ընտանիքի անդամներն անհագիստ են, հուզված: Մայրը վաստակավոր ուսուցչուհի է, Կարենը նաև ամուսնացած քույր ունի»,-պատմեց Սմբատ Մուղդուսյանը:

Գյուղապետը հաստատեց այն տեղեկատվությունը, որ Կարենն առողջական խնդիրներ ունի. «Մոտ հինգ տարի առաջ են ի հայտ եկել առողջական խնդիրները, մինչ այդ առողջ տղա էր: Նաև ծառայել է բանակում: Բուժման նպատակով տանեցիները հացի հետ հանգստացնող դեղեր էին տալիս: Հենց այդ խնդիրների պատճառով էլ չի ամուսնացել»,- ասաց գյուղապետը:

Նկատառումը, թե ադրբեջանական գյուղը շատ մոտ է, հնարավո՞ր է Կարենը չգիտակցելով շփվել է  թշնամի-հարևաների հետ, գյուղապետը իրատեսական չհամարեց: Նա նշեց, որ առաջներում շփում եղել է գյուղերի միջև, և տարեց գյուղացիները, գուցե, շփված լինեն, բայց երիտասարդ սերունդը վաղուց շփում չունի:

Գյուղապետը Կարենի սահմանը հատելը բացատրեց միայն մոլորվելու հանգամանքով, քանի որ դեպքը գիշերն ուշ ժամի է եղել, տարածքում  լույս չի եղել: