Գառնեցիները սայլերով ու դույլերով ջուր են կրում. նոր կառավարությունը դեռ չի արձագանքել

Ինչպես տեղեկացրել էինք, Կոտայքի մարզի Գառնի համայնքում  բնակիչները բողոքում են, քանի որ մեկ ամսից ավելի է՝ խմելու ջուր չունեն:

ԼՈւՐԵՐ.com-ի հետ զրույցում Գառնիի համայնքապետարանի աշխատակազմի քարտուղար Վարդան Մարտիրոսյանը նշեց, որ խմելու ջրի խնդիրը համայնքում օրակարգային է, և աշխատանքներ են կատարվում խնդիրը վերացնելու համար, սակայն աշխատանքներն ավարտելու հստակ ժամանակահատված չասաց:

Մեր դիտարկմանը, որ բնակիչները բողոքում են՝ ասելով, որ գյուղում մշտական ջուր հիմնականում ունեն հարուստները և կենտրոնի բնակիչները, իրենք խմելու ջրի հարցով դիմել են համայնքապետարան, որտեղից ստացել են խոստում, որ 5 օրվա ընթացքում խնդրին լուծում կտրվի, Մարտիրոսյանը բացառեց նման ժամկետ նշելը և ասաց.

«Ոչ մի տարբերություն չի կարող դրվել հարուստների և մնացած տնտեսությունների միջև: Մենք տեղյակ ենք եղել, որ գյուղի մի թաղամասում ոռոգման ջրի հետ կապված տեխնիկական աշխատանքներ են կատարվում և ջուր չկա: Հանձնարարել ենք արագացնել աշխատանքները։ Բացի դա, մենք նախօրոք հայտարարում ենք, որ մեծ ծավալի աշխատանքներ են կատարվելու խմելու ջրագիծը փոխելու համար և պարբերաբար որոշ թաղամասեր ջրազրկվելու են»:

Անդրադառնալով բնակիչների կողմից մեքենաներով և սայլերով ջուր բերելուն՝ Մարտիրոսյանը նկատեց, որ բնակիչները, բնականաբար, ջուր չլինելու դեպքում որևէ վայրից բերում են, սակայն սայլերով բերելը չափազանցված համարեց նրանց կողմից և նշեց, որ համայնքը բավականին մեծ է՝ շուրջ 8000 բնակչությամբ, և ջրի սպառումը շատ է: Եւ չնայած համայնքում ջրի պաշարները շատ են, սակայն շատ վատ ցանց ունեն։

«50-60 տարվա ջրագծեր են, որոնք  վերանորոգման ենթակա չեն և պետք է փոխվեն։ Բյուջեում եղած գումարը բավարար չէ, որ այդ խնդիրը լուծվի»,-ասաց նա և հավելեց, որ այս խնդրով օրերս դիմել են նոր կառավարությանը, սակայն դեռ պատասխան չեն ստացել։

Ստորև ներկայացնում ենք Գառնի համայնքի ջրագծերի վերոնորոգման ընթացքից լուսանկարներ: