Երեխաների առևանգման և անհետանալու դեպքերն ավելացել են
Երեխաների առևանգման և անհետանալու դեպքերը վերջին շրջանում ավելացել են, ոստիկանությունը, սակայն, ոչինչ չի ձեռնարկում, փաստացի անգործություն է ցուցաբերում։
Այս մասին լրագրողների հետ հանդիպման ժամանակ ասաց փաստաբան Տիգրան Աթանեսյանը։ Փաստաբանը լրագրողների հետ հանդիպման ժամանակ անդրադարձավ իր ձեռքի տակ գտնվող գործերից մեկին:
«Նիկոլ (կին է,-խմբ.) Պարազյանի նախկին ամուսինը երկու երեխաներին տարել է տեսակցության, սակայն վերադարձրել է մեկին, ասելով, որ մյուս երեխային առևանգել են փողոցում։ Առևանգման և երեխային ապօրինի պահելու մասին մայրը հաղորդում է ներկայացրել ոստիկանություն, սակայն նրանք միայն թղթեր են ստորագրել։
Չարենցավան քաղաքում մայր ծնողի որոնումների արդյունքում հայտնաբերել են փոքր երեխային, որը պահվում էր օտար կնոջ մոտ և սովորեցրել էին այդ կնոջը մայրիկ ասել։ Ոչ մի պետական մարմին աջակցություն ցույց չտվեց»,- ասաց Աթանեսյանը։
Նիկոլ Պարազյանը հավելեց, որ երեխայի գտնվելու վայրը պարզելուց հետո, ոստիկանության աշխատակիցների հետ գնացել են նշված տան մոտ, սակայն դուռը չեն բացել, իսկ ոստիկանները սեփականության անձեռնմխելիությունն ավելի են կարևորել, քան երեխայի կյանքը։
«Խնդիրը նրանում է, որ մենք գործ ունենք պետական մարմինների՝ պատասխանատվությունից խուսափելու, մարդու իրավունքները խախտվելու հետ»,- ասաց փաստաբանը և նշեց նաև, որ Նիկոլ Պարազյանը բռնության է ենթարկվել ամուսնու կողմից, սակայն ոստիկանությունն ու իրավապահ մարմիններն այս հարցում ևս անգործություն են ցուցաբերել, պատճառաբանելով, որ ընտանեկան խնդիրներ են, կհարթվեն։ Աթանեսյանն ասաց, որ Գլխավոր դատախազին բողոքել են, պահանջել ընթացք տալ դատական պրոցեսին, և եթե նրանց կողմից ևս քայլեր չձեռնարկվեն, կդիմեն միջազգային ատյաններին։
ՈՒՂԻՂ ԵԹԵՐ
Ամենադիտված 
Ադրբեջանից ներմուծված բենզինը պետք է մնա բենզալցակայաններում, չպետք է օգտվեն դրանից (տեսանյութ)
