Փաշինյանը նույնքան սկզբունքային կգտնվի՞ իր թիմակիցների հանդեպ

ՀՀ վարչապետի աշխատակազմի գործերի կառավարիչ Գևորգ Աճեմյանը ազատվել է աշխատանքից։ Ֆեյսբուքյան իր էջում նա գրել է, որ դիմում է ներկայացրել զբաղեցրած պաշտոնից ազատվելու վերաբերյալ: Գևորգ Աճեմյանն այս օրերին միանգամից երկու սկանդալի կիզակետում էր հայտնվել. նախ հայտարարել էր, որ ինքը հանդիսանում է «Կյանքի Խոսք» աղանդի անդամ, այդ հայտարարությանն էլ հաջորդել էր պաշտոնյայի կողմից պաշտոնեական դիրքի չարաշահման ակնհայտ դեպքը՝ Աճեմյանն իր մտերիմներից մեկի բինզեսի պաշտպանության համար կառավարություն էր հրավիրել իր մտերիմի մրցակիցներին և սպառնացել ձեռքներից վերցնել բիզնեսը: Փաստորեն, Աճեմյանը Փաշինյանի թիմի առաջին անդամն է, ով իր պաշտոնին հրաժեշտ է տալիս պաշտոնեական դիրքի չարաշահման հետևանքով՝ մի գործելաոճ, որը բնորոշ էր նախկին իշխանություններին: Մինչ օրս ևս եղել են հրաժարականներ, որոնց անհրաժեշտությունը առաջացել է այս կամ այն պաշտոնյայի թույլ տված արտահայտության պատճառով ի հայտ եկած հանրային մեծ ռեզոնանսի արդյունքում:

Այս դեպքը փոքր ինչ այլ է և իր մեջ կարող է նաև իրավական պատասխանատվության տարրեր պարունակել: Հենց այստեղ է, որ Նիկոլ Փաշինյանը պետք է ապացուցի՝ ինքն իր թերացած թիմակիցների հանդեպ նույնչափ անողոք է, որքան նախորդ իշխանության ներկայացուցիչների նկատմամբ: Նույնքան հավատարիմ է օրենքի տառին և ոգուն: Հակառակ դեպքում, մենք այդպես էլ ականատես ենք լինելու հրաժարականների և մեղայականների շքերթին, որոնք թերևս չարյաց փոքրագույնն են այդ պաշտոնյաների համար, իսկ օրենքի առաջ պատասխանատվության ենթարկվելը մի՞թե միայն նախորդ իշխանություններին տրվող «առավելությունն» է: Փաշինյանը ցանկացած պատեհ առիթ օգտագործում է վերահաստատելու համար, որ նոր Հայաստանում օրենքի առջև բոլորը հավասար են, այժմ եկել է այդ սկզբունքը գործնականում կիրառելու պատեհ պահը, և դա առաջին հերթին անհրաժեշտ է հենց Փաշինյանին:

Այն դեպքում, երբ վարչապետը ջանք ու եռանդ չի խնայում երկիր ներդրումներ բերելու, երկրի ներսում գործարար միջավայրը բարելավելու, գործարարների վստահությունը շահելու համար՝ նրա թիմակիցը փաստացի ջուրն է գցում այդ ջանքերը՝ ցույց տալով, որ ցանկացած պահի գործարարները կարող են հայտնվել պետական այս կամ այն պաշտոնյայի թիրախում, իսկ որպես սպառնալիքի գործիք հոլովվի ուժային կառույցի անունը: Առանց այդ էլ՝ շատ են մեղադրանքները, որ ԱԱԾ-ն փաստացի իրեն ոչ բնորոշ գործառույթներ է ստանձնել՝ դառնալով նոր իշխանությունների «գրպանային մահակը» ու «բոբոն»: Եթե ապացուցվի Աճեմյանի կողմից պաշտոնեական դիրքի չարաշահման փաստը՝ նա պետք է պատասխանատվություն կրի օրենքի պահանջին համապատասխան, եթե իհարկե՝ նոր Հայաստանում իրապես խաղի կանոններ են փոխվել և յուրայիններին «սեզոնային զեղչեր» չեն արվում…