Անփութությո՞ւն, թե՞ սադրանք. ի՞նչ է հասկացնում ռուսական կողմը

Վերլուծական 18 Հուլիս, 2018 18:00

Երեկ կրկին հանրության ուշադրության կենտրոնում հայտնվեց Գյումրիի ռուսական 102-րդ ռազմաբազան, սակայն ոչ մեր երկրի սահմանների «հերոսական պաշտպանությամբ»՝ ինչի համար էլ, փաստացի, այդ զորախումբն այստեղ գտնվում է, այլ լրիվ հակառակը՝ բանն այն է, որ ռուս զինծառայողները «անփութության» հետևանքով զորավարժությունների «պալիգոնի» էին վերածել Փանիկ գյուղը՝ առանց բնակչությանը, գյուղի ղեկավարությանը նախապես նախազգուշացնելու՝ կրակելով և պայթուցիկներ գործի դնելով: Արդյունքում՝ գյուղի բնակչությունը սարսափի մեջ է հայտնվել, կրակոցներից էլ մեկ երեխա է ուշաթափվել: Ընդ որում, տեսանյութը, որ տարածվել է, ցույց է տալիս, որ գյուղով անցնում է ռազմակայանի զինվորական բեռնատարների մի ամբողջ շարասյուն: Ինչպես կասեր ռուս հայտնի լրագրող Կիսիլյովը՝ զուգադիպությո՞ւն է. հազիվ թե…

Խնդիրը հետևյալն է՝ եթե երեկվա պատահարը անփութություն էր, ապա հայկական կողմը պետք է անցնի ռուսների հետ վերջնագրի լեզվով խոսելու քաղաքականությանը, որովհետև գյուղերում բնակվող մեր երեխաները, կանայք, տարեցները պարտավոր չեն ապրել ահը սրտներում, մտածելով որ ևս մեկ «Պերմյակով» կարող է անփութորեն և լրիվ պատահական կերպով հայտնվել իր տան շեմին: Այս ամենը կշարունակվի այնքան ժամանակ, քանի դեռ հայկական կողմը համարժեք արձագանք չի տալիս ռուսական ռազմաբազայի հրամանատարական կազմի կամայականություններին ու ապօրինություններին, ընդհուպ՝ մինչև նրանց առջև ֆինանսական պատասխանատվության հարց դնելով:

Իսկ եթե այս ամենը անփութության հետևանք չէ, և ռուսները պարզապես հերթական անգամ սադրում են Հայաստանի նոր իշխանություններին, ևս մեկ անգամ մեսիջ հղելով՝ «դուք այնքան էլ մեր սրտով չեք», ապա սա արդեն քաղաքական հարթության խնդիր է, որը ևս պետք է անհապաղ լուծման արժանանա. իզուր չէ, որ վարչապետ Փաշինյանի խոսնակը հայտարարել է՝ երկրի ղեկավարն անմիջական ուշադրության տակ է պահում այս հարցը: Պատահականությո՞ւն էր արդյոք, որ ռուսների շարասյունները ճանապարհը «կորցնում» են Փաշինյանի՝ ՆԱՏՕ-ի վեհաժողովին մասնակցելուց հետո: Որքան էլ որ մենք այնտեղ շոշափելի արդյունքներ չենք արձանագրել, սակայն ռուսական կողմին նյարդայնացնում է անգամ Հայաստանի մասնակցության փաստը: Եվ ի՞նչ էր սա՝ եթե ոչ հերթական փորձը ցույց տալու՝ ո՞վ է այս հողում տեր ու տիրակալ: Իսկ Փաշինյանից այժմ ակնկալվում է այդ հարցի պատասխանի հստակ ձևակերպումը համապատասխան քայլերի տեսքով՝ Հայաստանում տեր ու տիրակալ է միայն ու միայն օրենքը: Այսօր ՀՀ ՊՆ-ից տեղեկություն տարածվեց, որ նախարար Տոնոյանը պատրաստվում է հանդիպել մեր երկրում ՌԴ դեսպանի և ռազմական կցորդի հետ: Մնում է հուսալ, որ հարցը, գոնե այս անգամ, ռուս հրամանատարների ներողություն խնդրելով չի սահմանափակվի:

Ստելլա Խաչատրյան