Ու՞մ բաժին կընկնի ՀՖՖ նախագահի պաշտոնը

Վերջին շրջանում քննարկվում է Հայաստանի ֆուտբոլի ֆեդերացիայի նախագահ Ռուբեն Հայրապետյանի հրաժարականի հարցը: Նախօրեին լուրեր տարածվեցին այն մասին, որ Հայրապետյանը հրաժարական է ներկայացրել ՀՖՖ նախագահի պաշտոնից, և այդ պաշտոնում քննարկվում է Սյունիքի նախկին մարզպետ Վահե Հակոբյանի անունը։

ԼՈւՐԵՐ.com-ը մեկնաբանություն ստանալու համար զրուցեց Վահե Հակոբյանի հետ, ով տարածված խոսակցութոյւններն անհեթեթ որակեց:

Երեկ Ռուբեն Հայրապետյանն, անդրադառնալով իր հրաժարականի մասին լուրերին, հայտարարել էր, որ հրաժարական չի տալու և մամուլում առկա տեղեկությունները չեն համապատասխանում իրականությանը: Այնուհետև, խոսելով այն մասին, որ ՀՖՖ նախագահի պաշտոնում իրեն փոխարինողների ցանկում շոշափվում է նաև ԱԱԾ պետ Արթուր Վանեցյանի անունը, Հայրապետյանն ասել էր, որ Ռուբեն Հայրապետյանը հայտարարել էր, որ եթե Վանեցյանն առաջադրվի՝ ինքն իր թեկնածությունը չի առաջադրի ՀՖՖ նախագահի պաշտոնում.

«Եթե Արթուր Վանեցյանն իրականում ցանկանում է դառնալ ֆեդերացիայի նախագահ, ես գտնում եմ, որ դա լավագույն լուծումն է: Հավատացեք ինձ: ՀՖՖ-ի նախագահը պետք է լինի իշխանության հետ անմիջական կապ ունեցող մարդ. դա իմ անձնական կարծիքն է: Իմ աշխատանքային փորձը ցույց է տալիս, որ կան հարցեր, որոնք ունեն արագ լուծումների կարիք: Չունես իշխանությունների հետ անմիջական կապ՝ շատ հարցեր մնում են: Այժմ այդ խնդիրների առջև կանգնած ենք: Արթուր Վանեցյանին համարում եմ լավագույն թեկնածուն: Պայմանավորված խաղերը նրա ղեկավարության դեպքում կբացառվեն»,- նշել էր նա:

ՀՖՖ նախագահի պաշտոնում Արթուր Վանեցյանի թեկնածությունն առաջադրվելո՞ւ է, ի՞նչ դիրքորոշում ունի այս հարցում ԱԱԾ տնօրենը, մեր հարցին ի պատասխան՝ ԱԱԾ խոսնակ Սամսոն Գալստյանն ասաց. «Այս պահին ձեռնպահ ենք մնում հարցի շուրջ որևէ մեկնաբանություն տալուց, այդ հարցն  ուսումնասիրելու, քննարկելու կարիք ունի, որից հետո ԱԱԾ տնօրենը կհայտնի իր դիրքորոշումը»:

Հատկանշական է, որ Վանեցյանի անունը սկսեց շրջանառվել հատկապես այն բանից հետո, երբ վերջինս ուղեկցում էր վարչապետ Նիկոլ Փաշինյանին՝ լեգենդների՝ Երևանում կայացած հանդիպման ժամանակ, և, ի դեպ, օթյակում զբաղեցնում էր ՀՖՖ նախագահի տեղը: Նկատենք, որ դեռևս թավշյա հեղափոխության օրերին Փաշինյանը ծակ գնդակ էր տարել ՀՖՖ շենքի մոտ՝ հարյուրավոր ցուցարարների հետ միասին պահանջելով Հայրապետյանի հրաժարականը: Իսկ ահա արդեն վարչապետ դառնալուց հետո ֆեյսբուքյան ուղիղ եթերում Փաշինյանը նշել էր, թե հուսով է, որ ՀՖՖ նախագահի ընտրությունները երկրպագուների սրտով կլինեն:

Նշենք, որ Ռուբեն Հայրապետյանը սկսել է չպատասխանել մեր հեռախոսազանգերին: Սևանում կայացած ՀՖՖ 26-րդ համաժողովի նախօրեին, ԼՈւՐԵՐ.com-ի թղթակցի հետ վերջին զրույցում Հայրապետյանը հայտնեց, որ հիվանդանոցում է, վատառողջ է և չի կարող պատասխանել մեր հարցերին և սովորության համաձայն՝ առանց հաջողություն մաղթելու անջատեց հեռախոսը:

ՀՖՖ նախագահի ընտրության ժողովը նախատեսված է սեպտեմբերին, իսկ այդ օրվան նախորդող 10 օրվա ընթացքում պետք է թեկնածուներ առաջադրվեն: 

Սոնա Հարությունյան