Հայաստանը վճարում է չիրականացված վարկային ծրագրերի համար

Մեկնարկել է կառավարության հերթական նիստը։ Օրակարգում ընգրկված է 22 հարց։ Վարչապետ Փաշինյանը նախքան օրակարգին անդրադառնալը բոլոր նախարարներին խնդրեց հետևողական լինել նախարարությունների կողմից ստորագրված վարկային ծրագրերին, որոնց մեջ հայտնաբերվել են ստորագրված, սակայն գործնականում չիրականացված վարկային ծրագրեր, որոնց համար Հայաստանը վճարումներ է կատարում։

«Աշխատանքային քննարկումների ընթացքում պարզեցի, որ Հայաստանում կան վարկային ծրագրեր, որոնք չեն մեկնարկել, երբեմն կիսատ են մնացել, ընդ որում՝ կիսատ են մնացել ուրիշների կողմից պարտավորությունները չկատարելու պատճառով, սակայն ՀՀ-ն դրա համար վճարումներ է կատարում։ Այս իրավիճակը պետք է խորությամբ հասկանանք և քննարկենք»,-ասաց Փաշինյանը։

Նա նշեց, որ երկկողմ և եռակողմ  պայամանագրեր են ստորագրվել, որոնց գործառույթների իրակացումը մյուս կողմին է վերագրված, սակայն  այն չի կատարում իր պարտավորությունները, իսկ ՀՀ-ն դրանց համար տուգանքներ է վճարում։ Փաշինյանը ստեղծված իրավիճակը տարօրինակ որակեց, սակայն ամբողջական եզրահանգում կատարելու համար նախարություններին հրահանգեց իրենց կառույցներում ստուգել այդպիսի ծրագրերի առկայությունը։