Դեռ չի հասկացվում՝ ով ում բարեկամն է...

Առաջիկա ԱԺ խորհրդարանական ընտրություններում մասնակցող ուժերից հնարավոր ընդդիմադիրները դեռևս չեն նշմարվում հորիզոնում։ Եթե նախկինում հասկանալի էր, որ բոլոր ուժերը պայքարում են իշխող ՀՀԿ-ի դեմ, այժմ, ինչպես ասում են, իրողություն է փոխվել։ Այս պահին նոր իշխանության հետ կոալիցիա են կազմել ՀՅԴ-ն, «Ծառուկյան» դաշինքը: Նիկոլ Փաշինյանին աջակցություն են հայտնել նաև արտախորհրդարանական ուժերը։ Փաստացի՝ այս պահին նախկին իշխանություն ՀՀԿ-ն միակ ընդդիմադիր ուժն է։

 ԼՈւՐԵՐ․com-ի հետ զրույցում քաղաքագետ Արմեն Բադալյանը նկատեց, որ ԱԺ արտահերթ ընտրություններն, ամենայն հավանականությամբ, տեղի կունենան 2019թ. ապրիլ-մայիս ամիսներին, իսկ այս պահին դժվարացավ ընդդիմության հետ կապված տեսակետ հայտնել, քանի որ կուսակցությունների կողմից իրականացվում է անորոշ քաղաքականություն, որը հնարավորություն չի տալիս եզրակացություններ անել։

«Հեղափոխությանը բոլոր ուժերն են աջակցություն հայտնել, բացի ՀՀԿ-ից, սակայն խորհրդարանական ընտրությունների ժամանակ այդ բոլոր աջակցություն հայտնած ուժերը կդառնան մրցակիցներ և կսկսեն քննադատել։ Հաջորդ տարի՝ գարնանը դա կերևա, երբ փաստացի կսկսվի ընտրարշավը։ Ինչ վերաբերում է ՀՀԿ-ին՝ անհասկանալի է կուսակցության դիրքորոշումը, անուղղակի աղբյուրներից տեղեկանում ենք, որ նրանք սպասում են աշնանը, որ ակտիվանան, որպեսզի նոր իշխանությունների կողմից իրականացվող սխալների հաշվին կարողանան վարկանիշ բարձրացնել, սակայն սա կոպիտ սխալ է, քանի որ ՀՀԿ-ն չի կարող այդ կտրվածքով վարկանիշ բարձրացնել»,-նշեց Բադալյանը։

Նա ընդդիմության ձևավորման նպաստող գործոն է համարում էյֆորիայի ավարտը, որն, ըստ քաղաքագետի, վերջին շրջանում նվազում է, իսկ աշնանն ամբողջությամբ վերացած կլինի։

«Ինչ վերաբերում է վարչապետի հայտարարությանը, որ էյֆորիան չի վերանա, ապա էյֆորիա ասելով, գուցե վարչապետը, լինելով լրագրող, նկատի է ունեցել վարկանիշը, որն այժմ բարձր է, սակայն հավանական է՝ այն կարող է իջնել, քանի որ կառավարությունը գործնական, բովանդակային զարգացման ծրագրեր չի ներկայացրել»,-ասաց քաղաքագետը։

Բադալյանը նաև չբացառեց ԱԺ արտահերթ ընտրությունների ժամանակ արտաքին քաղաքական ուժերի միջամտությունը, մասնավորապես՝ Ռուսաստանի, քանի որ այժմ չկան ռուսամետ կուսակցություններ, և այդ ընտրազանգվածը «անտեր» է մնացել։ Այս բացն, ըստ քաղաքագետի, գուցե Ռուսաստանի կողմից լրացվի։ Նա նաև հավելեց, որ հնարավոր է՝ ԵՄ-ն և ԱՄՆ-ն առանձին փորձեն ֆինանսական աջակցություն ցուցաբերել իրենց դաշնակից ուժերին, որը կարող է փոխել քաղաքական ուժերի ներկայացվածությունը։