Տա՞լ զենք դատավորներին, թե՞ ոչ

ՀՀ արդարադատության նախարարությունը պատրաստվում է Կառավարությանը ներկայացնել դատավորներին հաշվեցուցակային զենք և պաշտպանական միջոցներ տրամադրելու որոշման նախագիծ, որի տրամադրմամբ պետք է զբաղվի ոստիկանությունը։ Ըստ «ՀՀ դատական օրենսգրքի» սահմանադրական օրենքի 63-րդ հոդվածի 1-ին մասի՝ դատավորն ունի հաշվեցուցակային զենք եւ պաշտպանության հատուկ միջոցներ պահելու եւ կրելու իրավունք: 

Տա՞լ զենք անվերապահորեն բոլոր դատավորներին, թե՞ ոչ, այս հարցը արդեն տևական ժամանակ է քննարկվում է, սակայն այդպես էլ վերջնական լուծում չի ստանում: Պատճառը հարցի շուրջ հավանաբար մասնագետների տարակարծության մեջ է:

Իրավաբան Արա Ղազարյան ԼՈւՐԵՐ․com-ի հետ զրույցում նկատեց, որ այդպիսի առաջարկ եղել է դեռևս 2007 թվականին՝ «ՀՀ դատական օրենսգիրքը» ընդունվելուց հետո, սակայն այժմ, անվերապահորեն, բոլոր դատավորներին զենք տրամադրելու անհրաժեշտությունը չի տեսնում։

«Այլ բան է կոնկրետ իրավիճակում անհրաժեշտություն ծագի զենք կրելու, օրինակ՝ սպառնալիքների դեպքում։ Այդ դեպքում դատավորը կարող է դիմում գրել, և նրան կտրամադրեն պաշտպանության միջոց։ Բայց, նորից եմ նշում, անվերապահորեն բոլորին զենք տրամադրելու անհրաժեշտությունը չեմ տեսնում»,-ասաց Ղազարյանը։

Մեր այն դիտարկմանը, գուցե խիստ անհրաժեշտություն է դատավորներին զենք տրամադրելը, քանի որ վերջին շրջանում բավականին հնչեղ գործեր են դատարաններում քննվում, Ղազարյանը նկատեց, որ հիմա առավել շատ սպառնալիքներ հնչում են փաստաբանների հասցեին, քան դատավորների:

Իսկ նախկին դատավոր Պարգև Օհանյանի կարծիքով Հայաստանը պետք է հետևի շատ այլ երկրների օրինակին, թե՛ դատախազության աշխատողներին թե՛ դատավորներին պետք է զենք տրամադրի։

«Միանշանակ, արժե։ Իսկ ինչո՞ւ ոչ։ Զենքը ունենալով շատ բան չի փոխվի, բայց զարգացած երկրներում ոչ միայն զենք ունեն, այլև պաշտպանված են։ Օրենքը այդ հնարավորությունը միշտ է տվել՝ դատավորը դիմում էր գրում, որը քննարկվում էր։ Իսկ աղմկահարույց գործերի դեպքում, օրինակ՝ հոկտեմբերի 27-ի գործը քննող դատավորները ունեին թիկնազոր և զենք։ Թող օրենքը լինի և դատավորն ինքը գնահատի իրեն սպառնացող վտանգն ու ապահովության համար հաշվեկշռային զենք ստանա»,-ասաց Օհանյանը, և հավելեց, որ իր աձնական օրինակով զենք կրելը եղել է հոգս, քանի որ այն պահելը մեծ պատասխանատվություն է։

Ոստիկանության պետին հանձնարարվելու է մեկամսյա ժամկետում որոշել դատավորներին տրամադրվող զենքի՝

• տեսակը,
• մոդելը,
• փամփուշտների քանակը,
• ինչպես նաև պաշտպանության հատուկ միջոցների տեսակները։

«Դատավորների՝ զենքի հետ անվտանգ վարվելու կանոնների, ինչպես նաև զենքի և պաշտպանության հատուկ միջոցների գործադրման ուսուցումը կազմակերպում է ոստիկանությունը»,- նշվում է որոշման նախագծում։

Դատավորներին զենք եւ պաշտպանության հատուկ միջոցներ տրամադրվելու է Բարձրագույն դատական խորհրդին ուղղված դիմումի հիման վրա: Իսկ ահա դատավորի լիազորությունները դադարելու կամ դադարեցվելու կամ նրա լիազորությունները մահվան, նրան անգործունակ, անհայտ բացակայող կամ մահացած ճանաչելու հիմքով դադարած լինելու դեպքերում տրամադրված զենքը եւ պաշտպանության հատուկ միջոցները դատավորի ընտանիքի անդամը մեկշաբաթյա ժամկետում պետք է հանձնի ոստիկանություն: