Այո՛, իմ հետ զենք եղել է

Այսօր «Սասնա ծռերի» անդամ Պավլիկ Մանուկյանի խափանման միջոցը փոխելու վերաբերյալ միջնորդություն ներկայացվեց Երևանի ընդհանուր իրավասության Շենգավիթի դատարանին: Պավլիկ մանուկյնաի համար անձնական երաշխավորությւոն են ներկայացրել «Ծառուկյան» խմբակցության պատգամավորներ Վահե Էնֆիաջյանը և Շաքե Իսայանը։

Դատական նիստին պատգամավորներն անձամբ գտնվում էին դատարանում` հաստատելով անձնական երաշխավորությունը։ Միջնորդությանը միացավ նաև պաշտպանական կողմը միացավ։ 

Մեղադրող Արամ Արամյանը միջնորդության վերաբերյալ դիրքորոշում հայտնելիս նշեց, որ մինչև դրա քննարկումը, դատարանը նախ պետք է հարցաքննի Մանուկյանին: Խմբի անդամներ Էդվարդ Գրիգորյանի եւ Մխիթար Ավետիսյանի ենթադրաբար իրականացրած գործողությունների վերաբերյալ դատավոր Մակյանի հարցին Պավել Մանուկյանը պատասխանեց, որ պնդում է նախորդ դատական նիստում արած իր հայտարարությունը:

«Ես արդեն հայտարարել եմ, որ դա բացարձակ ճշմարտություն է: Եթե այս քայլն Էդվարդ Գրիգորյանի փոխարեն կատարած լիներ Արամ Մանուկյանը՝ իմ տղան, ես հայտարարելու էի, որ այդ պատահական կրակոցի հեղինակն իմ տղան է, չնայած Արամ Մանուկյանն ինքն էր ասելու, որ` ես եմ»,- ասաց Մանուկյանը:

Ամբաստանյալը նշեց նաև, որ կրակոցը եղել է իրենից մոտ 1 մետր հեռավորության վրա:

«Անձամբ ներկա եմ եղել, եւ քիչ էր մնում, որ պատահաբար զոհվեր մեր ընկեր Արմեն Լամբարյանը, պատահական կրակոց էր: Իսկ բանկոմատի վերաբերյալ ոչ մեկս էլ տեղյակ չենք եղել՝ բացառությամբ իրեն: Բանկոմատը բացվել է, սակայն հափշտակություն տեղի չի ունեցել, ես ներկա չեմ եղել բանկոմատը բացելուն: Արմեն Բիլյանն ընդհանրապես դեպքի վայրում չի եղել»,- հայտնեց Պավլիկ Մանուկյանը:

Մանուկյանն ասաց, որ այս մասին ավելի վաղ չէր հայտնում դատարանին, որովհետև արդար դատավարություն չէր ակնկալում:

Նա նաև հայտարարեց, որ ՊՊԾ գունդ մտնելիս իր մոտ զենք է եղել, որով 1993 թվականին սպանել է թուրքի։

«Այո, իմ հետ զենք եղել է, ես վերցրել եմ իմ հետ իմ ձեռքով սպանված թուրք ավագ լեյտենանտի զենքը, էդ զենքն իմ կյանքով մեկ անցել է, եւ դատավարության ավարտից հետո էդ զենքը ես պահանջելու եմ ձեզանից բոլորից: Դա արդարության համար է, դա նախատեսված չէ ինչ-որ մի հայի դեմ»,-ասաց Մանուկյանը։

Սակայն նա չհիշեց, թե խմբի մյուս անդամների մոտ մոտ զենք եղել է, թե ոչ։

Դատարանը հեռացավ խորհրդակցական սենյակ:

Պավլիկ Մանուկյանի խափանման միջոցը փոխելու վերաբերյալ ներկայացրած միջնորդության մասին որոշումը կհրապարակվի 16:00-ին: