Արդի հայ գրականության մայրամու՞տ, թե՞ նոր վերածնունդ

«Ունենք ներկայանալի գրականություն բոլոր ժանրերում անխտիր, թե՛ արձակ, թե՛ պոեզիա, թե՛ թատերգություն»: Այսպիսի տեսակետ հայտնեց այսօր լրագրողների հանդիպման ժամանակ Հայաստանի գրողների միության նախագահ Լևոն Անանյանը:

Այսօրվա գրական առաջատարները Վարդգես Պետրոսյանի «Գարուն»-ի հաջորդներն են, որոնց շունչը հասել է մինչև մեր օրերը: 2001-2003 թվականներին մեր գրական դաշտում տեղի ունեցան առանցքային փոփոխություններ՝ Գրողների միությունում ստեղծվեց երիտասարդ գրողների բաժանմունք, վերականգնվեցին Ծաղկաձորի երիտասարդ գրողների ամենամյա հավաքները, այնուհետև միության անդամներ սկսեցին դառնալ երիտասարդները, հիմա 500 անդամների ցանկում 40 երիտասարդներ ունենք՝ 18 տարեկանից սկսած: Այսօրվա սերունդը տիրապետում է լեզուների, համացանցի, և ծանոթ է հայ ու համաշխարհային գրականության անցուդարձին:

Այսօր մենք ունենք կարևոր ձեռքբերումներ բոլոր ժանրերում, և ամենակարևորը, թե ինչպես է բաղդատվում հայ գրականությունը համաշխարհային գրականության համատեքստում։ Դրա լավագույն ցուցիչը, իհարկե, թարգմանությունն է: Վերջին 2-3 տարիներին պետական աջակցությամբ կարողանում ենք տարբեր լեզուներով թարգմանել արտասահմանյան գրականությունը և մերը:

Տպագրության ընթացքում է գտնվում արդի հայ պոզիան և անթոլոգիան ֆրանսերեն, անգլերեն, գերմաներեն լեզուներով, նախապատրաստական փուլում է արդի պոեզիան շվեդերեն, արաբերեն, իսպաներեն: Հայ արձակը թարգմանել ենք անգլերեն, գերմաներեն: 12 հատորով պարսկերեն լույս կտեսնի ժամանակակից հայ բանաստեղծներ մատենաշարը: Գրական կամուրջներ են վերականգնվել Ռուսաստանի, Ուկրաինայի, Գերմանիայի հետ: Հուլիսի վերջում Երևանում կունենաք երկու գրքի շնորհանդես՝ արդի գերմանական պոեզիան հայերեն, և արդի հայ պոեզիան գերամներեն: Կհյուրընկալենք Գերմանիայի գրողների միության նախագահին:

Վերջին տարիներին մեծ թափով առաջընթաց է ապրում Վրաստանի գրողների միության հետ համամագործակցությունը: Կարող ենք վստահաբար ասել, որ հայ գրողներին այնքան շատ են կարդում Վրաստանում, որքան վրացիներին Հայաստանում, ինչն իր խոսքում հավաստեց նաև Վրաստանի գրողների միության նախագահ Մաշվալա Գոնաշվիլին:

Երիտասարդների դեպքում որոշակի խմորման և փնտրտուքների շրջան է, մարդիկ, որոնք իրականում գրող չեն, ժամանակի ընթացքում կմաղվեն, ու այսօր էլ արդեն նկատելի է, որ նրանց դերը գրականության մեջ կեղծ է: Միակ խնդիրն այն է, որ ես այսօր գրականությամբ չեմ կարող գումար վաստակել,- տեսակետ հայտնեց ՀԳՄ անդամ, երիտասարդ բանաստեղծուհի Մանե Գրիգորյանը: