Ստեղծվել է գերնոսր նյութ

Գերմանացի քիմիկոսները ստեղծել են նոր նյութ և անվանել այն աերոգրաֆիտ։ Այս նյութի տարբերակիչ հատկանիշն է գերցածր խտությունը՝ խորանարդ սանտիմետրում մեկ միկրոգրամից պակաս։ Գիտնականների հոդվածը տպագրվել է Advanced Materials պարբերականում, որում ներկայացվել են նյութի ստացման տեխնոլոգիան և դրա առանձնահատկությունները։

Այս նյութն իրենից ներկայացնում է ածխածնային խողովակների ցանց։ Դրա ստացման համար գիտնականները սկզբից հատուկ տեխնոլոգիայով պատրաստել են ցինկի օքսիդից կաղապար։ Այնուհետև այդ կաղապարը տեղադրվել է քվարցի խողովակում, որում բարձր ջերմաստիճանների ազդեցությամբ կաղապարի վրա աճեցվել է աերոգրաֆիտը։

Հետազոտության հեղինակների կարծիքով, նոր նյութն աչքի է ընկնում բացառիկ մեխանիկական և էլեկտրական հատկություններով։ Մասնավորապես, այն կարող է կիրառվել միկրոէլեկտրամեխանիկական սարքերում, ինչպես նաև էլեկտրոդների արտադրությունում։ Այն հատկապես պահանջված կարող է լինել այնպիսի սարքավորումներում, որոնք պիտի դիմանան մեծ արագացումներին։

Նոր նյութն իր անվանումը ստացել է աերոգելերի նմանությամբ։ Այդպես են կոչում այն նյութերը, որոնց կառուցվածքը հիշեցնում է գել (ժելե), սակայն որում հեղուկ վիճակը փոխարինված է գազայինով։ Նման նյութերը, օժտված լինելով ցածր խտությամբ, միաժամանակ կարող են շատ կարծր և պինդ լինել։ Բացի այդ, դրանք նաև գրեթե թափանցիկ են, ինչի պատճառով երբեմն անվանվում են նաև «պինդ ծուխ»։

2011 թվականի նոյեմբեր ամսին Science պարբերականում լույս է տեսել մի հոդված, որում նկարագրված էր գերթեթև մետաղական սպունգի արտադրության տեխնոլոգիան։ Սկզբից գիտնականները ստեղծում էին պոլիմերային հիմք, որում փորվում էին մեծ քանակությամբ գլանաձև խողովակներ։ Տեխնոլոգիայի հեղինակների պնդմամբ, նոր նյութը կարող է լայն կրառություն գտնել ջերմամեկուսիչների, ձայնամեկուսիչների, մարտկոցներում առավել էֆեկտիվ էլեկտրոդների և մի շարք այլ սարքերի արտադրության գործում։