Չինաստանում կորոնավիրուսի տարածումը կանխելու նպատակով սկսել են թղթադրամներ ոչնչացնել

Չինաստանի իշխանությունները որոշում են կայացրել ոչնչացնել կորոնավիրուսից առավել շատ տուժած տարածքներից հավաքված գումարների մի մասը, հայտնում է Business Insider հրատարակությունը: 

Որոշումը վերաբերում է հիվանդանոցներից, շուկաներից, ավտոբուսներից և վիրուսի տարածման այլ վայերերից հավաքված թղթադրամներին: Բացի այդ, երկրի Կենտրոնական բանկը հոգացել է այն մասին, որ առևտրային վարկային կազմակերպությունները վարակված տարածքներից հավաքված գումարներն առանձին պահեն:

Նշվում է, որ չոչնչացված թղթադրամների մի մասը կվարակազերծվի: Ծրագրվում է, որ գումարները կմշակվեն ուլտրամանուշակագույն ճառագայթով և իրենց հերթին նախքան շրջանառության մեջ մտնելը երկու շաբաթ կմնան կարանտինային գոտում:

Չինաստանի իշխանություններն անհայտ տեսակի վիրուսի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին: Համաճարակը բռնկվել է 11 մլն բնակչություն ունեցող Ուհան քաղաքում:

Վերջին տեղեկությունների համաձայն` նոր տեսակի կորոնավիրուսով վարակման դեպքերի թիվը գերազանցել է 72 հազարը: Համաճարակի զոհ է դարձել 1868 մարդ:
Վերջին օրերին երկրի տարածքում գրանցվել է վարակման 1886 հաստատված, նոր դեպք: Նրանց մեծ մասը Հուբեյ քաղաքում է: Փետրվարի 17-ին վարակի հետևանքով մահացել է 98 մարդ:

Միևնույն ժամանակ հաղորդվում է, որ այս օրերին 1701 մարդ բուժվել և դուրս է գրվել հիվանդանոցից, իսկ 27 908 պացիենտի մոտ, որոնք վիրուսի հայտնաբերման համար հետազոտվում էին, վիրուսի ախտանշաններ չեն հայտնաբերվել: