Վրաստանում կորոնավիրուսով վարակման ևս 5 դեպք է գրանցվել

Վրաստանում նոր կորոնավիրուսով վարակվածների թիվը հասել է 9-ի, հայտնում է Sputnik-ը՝ վկայակոչելով Վրաստանում կորոնավիրուսի վերաբերյալ տեղեկություններ հաղորդող հատուկ կայքին:

Այսպիսով, այսօր հայտնի է դարձել կորոնավիրուսով վարակման ևս հինգ դեպք:

Այժմ Վրաստանում 162 մարդ կա կարանտինում, իսկ բուժհաստատություններում բժիշկների հսկողության տակ է գտնվում ևս 45 քաղաքացի՝ կորոնավիրուսի կասկածանքով:

Նշվում է, որ կորոնավիրուսով վարակված հինգ քաղաքացիներն Իտալիայից Վրաստան են ժամանել 44-ամյա տղամարդու հետ, ում մոտ վարակը հայտնաբերվել էր դեռ կիրակի օրը:

Մինչ այս, Վրաստանում վարակված քաղաքացիներից երեքը Իրանից ժամանած տղամարդիկ էին, մեկն էլ Իտալիայից ժամանած մի կին: