Ղրղզստանում ծեծի են ենթարկել, ապա ձերբակալել Մարտի 8-ի կապակցությամբ ակցիա իրականացնող կանանց

Ղրղզստանի մայրաքաղաք Բիշքեկում մոտ 20 կին է բերման ենթարկվել, հայտնում է Апрель լրատվական գործակալությունը:

Կանայք ամենամյա ակցիա են իրականացրել այսօր, որն սկսվել է մայրաքաղաքի Հաղթանակ հրապարակից: Մի քանի րոպե անց կանանց վրա են հարձակվել դիմակավորված անձինք և ծեծի ենթարկել մասնակից կանանց ու երեխաներին:

Աղբյուրի փոխանցմամբ՝ երբ լսվել է ոստիկանների սուլոցը, դիմակավորված տղամարդիկ փախուստի են դիմել դեպքի վայրից, սակայն իրավապահները ձերբակալել են ոչ թե նրանց, այլ ակցիա իրականացնող կանանց:

Մոտ 20 կին տեղափոխվել է Բիշքեկի Սվերդլովսկի շրջանի Ներքին գործերի վարչություն: