Երկու ավիաաղետները Boeing-ի վրա կնստեն առնվազն 18,7 մլրդ դոլար. CNN

Boeing օդատիեզերական կորպորացիայի ուղղակի եւ անուղղակի վնասները Boeing 737 MAX մոդելի երկու ինքնաթիռների կործանման հետեւանքով կգերազանցեն 18,7 մլրդ դոլարը: Այս հաշվարկները մարտի 10-ին ներկայացրել է CNN հեռուստաընկերությունը։

Նրա գնահատումներով՝ պատվիրատուներին 737 MAX-երի փոխհատուցումը, որոնց շահագործումը կասեցվել է, արդեն հասնում է 8,3 մլրդ դոլարի: Եվս 6,3 մլրդ դոլարը Boeing-ի ծախսերի ավելացումն է այս շարքի արդիականացված ինքնաթիռների արտադրության համար: Բացի այդ, կորպորացիան ինքը շուրջ 4 մլրդ դոլար է գնահատել 737 MAX-երի հավաքման վրա բյուջեից դուրս ծախսերը դրանց շահագործումը վերսկսելուց հետո: Երկու ավիաաղետների զոհերի հարազատներին փոխհատուցման ֆոնդը սահմանված է 100 մլն դոլարի չափով:

Մինչդեռ վերլուծաբան Ռոնալդ Էփսթեյնը՝ ամերիկյան Bank of America-ի Merrill Lynch ստորաբաժանումից, ներկայացրել է կորպորացիայի հնարավոր վնասների այլ գնահատական: «Մեր գնահատականը մոտավորապես 23 մլրդ դոլար է ամեն ինչի համար, ներառյալ կորսված կյանքերի համար վնասի փոխհատուցումը»,-նրա խոսքը մեջբերում է հեռուստաընկերությունը: «Այդ թիվը կաճի, եթե թռիչքների արգելքն է ավելի երկարի»,-հավելել է փորձագետը: Boeing 737 MAX ինքնաթիռների շահագործումը դադարեցվել է երկու ավիաաղետից հետո: 2019 թվականի մարտի 10-ին Եթովպիայում կործանվեց Ethiopian Airlines ավիաընկերության Boeing 737 MAX 8-ը, զոհվեց 157 մարդ: 2018 թվականի հոկտեմբերի 29-ին Ինդոնեզիայում Lion Air ընկերության համանման մոդելի ինքնաթիռի աղետի զոհ դարձավ 189 մարդ: Boeing-ի ղեկավարությունը խոստովանեց, որ երկու դեպքում էլ օդանավերում դրանց կործանումից առաջ տեղի է ունեցել խափանում մանեւրայնության բնութագրերի բարելավման համակարգում: Դրանից հետո բազմաթիվ երկրներ, ներառյալ ՌԴ-ն, ԱՄՆ-ն եւ Եվրամիության պետությունները, անվտանգության նկատառումներով դադարեցրել են այդ սերիայի ինքնաթիռների շահագործումը, հաղորդել է ՏԱՍՍ-ը: