Քննարկման է ներկայացվել «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացում կատարելու մասին» օրինագիծը

ԱԺ առողջապահության և սոցիալական հարցերի մշտական հանձնաժողովը Նարեկ Զեյնալյանի նախագահությամբ հոկտեմբերի 7-ին գումարել է արտահերթ նիստ: Այս մասի հայտնում են ԱԺ լրատվական ծառայությունից:

ՀՀ աշխատանքի և սոցիալական հարցերի նախարարի առաջին տեղակալ Ռուբեն Սարգսյանը երկրորդ ընթերցման ընթացակարգով քննարկման է ներկայացրել «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացում կատարելու մասին» օրենքի նախագիծը:

Հիշեցնենք, որ օրինագծով սոցիալական փաթեթի շրջանակում հատկացվող գումարները պետական պաշտոն և պետական ծառայության պաշտոն զբաղեցնող անձանց հայեցողությամբ կարող են փոխանցվել նաև այն հիմնադրամներին, որոնց գործունեությունն ուղղված է ՀՀ կայուն ու համաչափ զարգացում ապահովվող ծրագրերի իրականացմանը, տնտեսության կայունացման օժանդակմանը կամ այլ համապետական ծրագրերի իրականացմանը: ՀՀ կառավարության որոշմամբ սահմանվելու են այն հիմնադրամները, որոնց կթույլատրվի փոխանցումներ կատարել:

Հանձնաժողովի նախագահ Նարեկ Զեյնալյանը և նախագահի տեղակալ Հերիքնազ Տիգրանյանը 4 առաջարկ են ներկայացրել, որոնք Կառավարության ներկայացուցչի համար ընդունելի են եղել: Մասնավորապես առաջարկվել է նախագծի 2-րդ մասից հանել «պետական պաշտոն և պետական ծառայության պաշտոն զբաղեցնող անձանց հայեցողությամբ» արտահայտությունը, նախագծում ներառել «սոցիալական փաթեթի շահառուներ» արտահայտությունը, սահմանվող դրույթի իրագործման համար սահմանել մեկ տարի ժամկետ:

Օրինագիծն արժանացել է հանձնաժողովի դրական եզրակացությանը: