Ուկրաինայում AstraZeneca պատվաստանյութով պատվաստվելուց հետո մարդ է մահացել

Ուկրաինայի ռազմական հիվանդանոցներից մեկի դեղատան դեղագործը մահացել է AstraZeneca պատվաստանյութով կորոնավիրուսի դեմ պատվաստվելուց անմիջապես հետո, հաղորդում է երկրի Առողջապահության նախարարության մամուլի ծառայությունը: Նախնական տեղեկությունների համաձայն՝ մահվան պատճառը գլխուղեղի սուր ինսուլտն է: Տղամարդը ունեցել է ծանր քրոնիկ սրտանոթային հիվանդություններ, շաքարախտ և ուղեկցող այլ հիվանդություններ: «Մարտի 15-ին տղամարդը պատվաստվել է COVID-19- ի դեմ AstraZeneca պատվաստանյութով։ Տղամարդը հակացուցումներ չուներ պատվաստանյութի ներմուծման, մասնավորապես` ալերգիա դեղամիջոցի որևէ բաղադրիչի նկատմամբ: Նույն օրը պատվաստանյութի նույն տարայից պատվաստվել է ևս 9 մարդ: Այլ հիվանդների պատվաստումից հետո ոչ մի անբարենպաստ իրադարձություն չի գրանցվել», - հայտնել է Առողջապահության նախարարությունը։ Մահվան ճշգրիտ պատճառը պարզելու համար նշանակվել է դատաբժշկական փորձաքննություն։