Ինչո՞ւ է կարևոր ակադեմիական «քաղաքի» ստեղծումը․ Գևորգ Պապոյան

ԱԺ «Իմ քայլը» խմբակցության պատգամավոր Գևորգ Պապոյանը գրառում է արել Ֆեյսբուքի իր էջում՝ անդրադառնալով ակադեմիական քաղաքի կառուցման գաղափարին, որը, ըստ պատգամավորի, ունի նվազագույնը 3 կարևոր բաղադրիչ՝ կրթական, տնտեսական և մայրաքաղաքի բեռնաթափում:

«Կրթական բաղադրիչի էությունը կայանում է մի կողմից այն հանգամանքով, որ ակադեմիական քաղաքում լինելու է իրապես ակադեմիական, կրթական միջավայր, քանի որ բոլորը ուսանողներ ու դասախոսներ են՝ չհաշված օժանդակ անձնակազմը, առկա են լինելու մեծ ու հարուստ գրադարաններ, սպորտային համալիրներ, լողավազաններ՝ նախատեսված միայն ուսանողների և դասախոսների համար, նորագույն տեխնոլոգիաներով լեցուն լսարաններ, ժամանակակից լուծումներով այգիներ, նոր պայմաններին բավարարող լսարաններ, դասախոսների աշխատասենյակներ, զարգացած հանրակացարանային ենթակառուցվածքներ և այլն:

Մյուս կողմից՝ չեն լինի այն խոչընդոտները, որոնք այսօր առկա են մեր պայմաններում արդյունավետ կրթություն տալու կամ ստանալու համար, ամենապարզ օրինակը աղմուկն է. վերոնշյալը կհաստատեն ԵՊՀ-ի, ՀՊՏՀ-ի, ՀՊՄՀ-ի, ՀՊՃՀ-ի և այլ բուհերի այն ուսանողները, որոնք դաս են անում Խանջյան, Չարենց, Նալբանդյան, Տերյան, Հերացի և այլ փողոցների անմիջական հարևանությամբ, որտեղ անգամ փակ պատուհանների պայմաններում հաճախ ուսանողի և դասախոսի ձայնը լսելի չէ՝ քաղաքային աղմուկի պատճառով:

Տնտեսական բաղադրիչը կայանում է նրանում, որ մի կողմից երկրում կաշխուժանա քաղաքաշինությունը, կստեղծվի նոր ՀՆԱ, մյուս կողմից էականորեն կաճի զբոսաշրջությունը՝ ընդ որում՝ երկու ուղղությամբ, մի կողմից կաճի կրթական նպատակով երկիր այցելող օտարերկրացի ուսանողների թիվը, ինչն էլ իր հերթին կբերի ինչպես ուղղակի ֆինանսական ներհոսքի, այնպես էլ մի շարք ենթակառուցվածքների զարգացման՝ միտված այդ ուսանողներին սպասարկելուն:

Մյուս կողմից Երևանի կենտրոնի շենքերը պետությունը կարող է բարձր գնով վաճառել կամ վարձակալության տալ մասնավոր սեկտորին, ինչը կարող է բերել նոր հյուրանոցների բացմանը, այդ շենքերի կառուցմանն ու վերակառուցմանը, որի հետևանքով կավելանա զբոսաշրջիկների թիվը, կաշխուժանա շինարարությունը և տնտեսության մյուս ճյուղերը՝ ստեղծելով բարձր վարձատրվող հազարավոր նոր աշխատատեղեր: Վերոնշյալը կարող է չվերաբերվել միայն առանձին ճարտարապետական արժեք ներկայացնող շենքեր:

Մայրաքաղաքի բեռնաթափումը նույնպես կարևոր վերջնարդյունք է, ինչը հնարավորություն կտա խուսափել ժամանակի ընթացքում էլ ավելի ահագնացող խցանումներից, էականորեն կլուծվի ավտոմեքենաների կայանման խնդիրը:

Ակադեմիական քաղաքը կարող է լինել Երևանի հարևանությամբ, պետք է գործի անխափան և արագ տրանսպորտային համակարգ, որը կկապի այն Երևանի հետ, կունենա զարգացած ավտոկայանատեղիների ենթակառուցվածք, գերազանց հանրակացարանային հատված և այլ ենթակառուցվածքներ»,- գրել է պատգամավորը:

Հիշեցենքն, որ մարտի 28-ին Արագած համայնքի բնակիչների հետ հանդիպման ժամանակ վարչապետ Նիկոլ Փաշինյանն անդրադարձել է կրթական բարեփոխումներին և հայտնել  բուհական ակադեմիական «քաղաք» ստեղծելու գաղափարի մասին, որը բուռն քննարկման է ենթարկվում սոցցանցերում։