Փորձում ենք այնպես անել, որ խաղաղ դարաշրջան բացելը լինի ոչ միայն Հայաստանի, այլ տարածաշրջանի մյուս երկրների օրակարգը․ Փաշինյան

 Հայաստանի վարչապետ Նիկոլ Փաշինյանն ընդգծում է, որ Հայաստանի իշխանության համար կարևոր քաղաքական ուղղություններից է Հայաստանի շուրջ բարենպաստ միջավայրի ձևավորումը։ Հանրային հեռուստաընկերությանը տված հարցազրույցում վարչապետն անդրադարձել է Հայաստանի և տարածաշրջանի համար խաղաղ դարաշրջան բացելու օրակարգին՝  նշելով, որ այդ օրակարգը նրա մասին չէ, որ Հայաստանի վրա պետք է հարձակվեն, իսկ Հայաստանը պետք է խաղաղություն քարոզի։ «Զինված ուժերի և բանակի բարփոխումները և մեր երկրին պատշաճ պաշտպանական կարողություններով օժտելը մեր առաջնահերություններից է,  և մենք շարունակելու ենք այդ ճանապարհով գնալ, բայց մյուս կողմից շատ կարևոր քաղաքական ուղղություններից է Հայաստանի շուրջ բարենպաստ միջավայր ձևավորելը, ինչպես նախինում առիթ ունեցել եմ ասելու՝ թշնամության մթնոլորտի հաղթահարման փորձեր անելը։ Որովհետև, ի վերջո, ինչքան թշնամանքի մթնոլորտը խորանա, այն բերելու է կատակլիզմների, և սա ակնհայտ է, և փորձել կառավարել թշնամանքի մթնոլորտը շատ կարևոր օրակարգ է, որը մենք պետք է առաջ տանենք։ Ի՞չ է դա նշանակում՝ այնտեղ, որտեղ հնարավոր է իրականացնել համագործակցություն, փորձել իրականացնել համագործակցություն, մասնավորապես տարածաշրջանային կոմունիկացիաների բացման վերաբերյալ, այնտեղ, որտեղ հնարավոր չէ համագործակցություն, փորձել կառավարել թշնամանքը և թշնամանքի մթնոլորտը, փորձել Հայաստանի և Արցախի շուրջ առավել բարենպաստ միջավայր ստեղծել, փորձել մեր տեսակետներն ավելի ընկալելի և հասանելի դարձնել միջազգային հանրությանը և տարածաշրւջանի երկրներին։ Սա մի ուղղություն է, որ մենք պետք է առաջ տանենք։ Խաղաղության օրակարգը նրա մասին չէ, որ մեզ վրա հարձակվեն, իսկ մենք խաղաղություն քարոզենք»,- մանրամասնել է վարչապետը։

Նա հավելել է, որ շատ լավ գիտեն՝ Հայաստանի և տարածաշրջանի համար խաղաղ զարգացման դարաշրջան բացելը  չի կարող միայն Հայաստանից կախված լինել։ «Շատ կարևոր է, թե ինչպիսի դիրքորոշումներ կունենան նաև այն պոտենցիալ շահառուները, որոնց դիրքորոշումից նույնպես կախված է այս օրակարգի սպասարկումը։ Եվ մենք փորձում ենք հենց դա անել, որպեսզի այս օրակարգը լինի ոչ միայն Հայաստանինը,  այլ լինի տարածաշրջանի մյուս երկրներինը նույնպես, լինի միջազգային հանրության տեսակետը՝ իրենց օրակարգը Հարավային Կովկասում վարվող քաղաքականության տեսանկյունից։ Մենք պիտի նաև հասկանանք, որ արդյունքները կարող են լինել աշխատանքի արդյունք, այսինքն՝ արդյունքները գալիս են աշխատանքի բերումով։ Հարցն այն է, մենք այդ ուղղությամբ ուզո՞ւմ ենք աշխատել, թե՞ ոչ։ Եթե երաշխավորված լիներ այդ ամենը, արդեն երաշխիքը կսկսեր աշխատել։ Հենց դրանում է ամբողջ խնդիրը՝ պատրաստվո՞ւմ ենք մենք այդ ուղղությամբ ջանքեր գործադրել, թե՞ չէ, ինչը չի նշանակում, որ պիտի մոռանանք Հայաստանի պաշտպանության անհրաժեշտության օրակարգը կամ ընդհանրապես որևէ օրակարգ»,- եզրափակել է Նիկոլ Փաշինյանը։