Հոգեբանը պատմել է, թե ինչպես են մարդու վրա ազդում սեռական այլասերվածության տեսարաններ պարունակող ֆիլմերը

Սեռական այլասերվածության տեսարաններ պարունակող ֆիլմերը, անշուշտ, կարող են ազդեցություն ունենալ այն դիտողի հոգեկան աշխարհի վրա, ասում է պրակտիկ հոգեբան, սեքսապաթոլոգ Ալեքսանդրա Միլլերը։

Մարդու ուղեղում, ինչպես պարզաբանել է փորձագետը, կան հայելային նեյրոններ, որոնք «պատճենում են» վարքագիծը, այդ թվում՝ բռնության և սեռական այլասերվածության տեսարանները։ Եթե ​​անգամ հոգեպես առողջ մարդը նայի այս տեսարաններին ու նույնիսկ եթե դրանք իրեն դուր չգան, ուղեղը կֆիքսի դրանք։

«Չեմ ասում, որ նա կկրկնօրինակի, բայց նման պահվածքը ուղեղում ինչ-որ տեղ մնում է, այո, այսինքն, ամեն դեպքում, բռնության տարբեր տեսարանները կամ վարքագծի շեղումները դրական ազդեցություն չեն ունենում հոգեկանի վրա։ Եվ ավելի լավ կլիներ ինչ-որ կերպ ավելի պոպուլյար դարձնել տարատեսակ դրական տեսարանները ու ինչ-որ դրական օրինակները»,- նշել է Միլլերը։

Ընդ որում, եթե ֆիլմերում նման տեսարաններ տեսել է մտավոր թերզարգացած կամ, օրինակ, սադիզմի հակում ունեցող անձը, ապա ուղեղի հայելային նեյրոնները ստացել և «ձայնագրել» են արդեն իսկ դրա մեջ եղած տեղեկությունը։ Այսպիսով, գրգռիչը մտնում է ուղեղ՝ առաջացնելով ռեակցիա, որը կարող է հանգեցնել սրացման և տարբեր խանգարումների։

Միլլերը նաև կոչ է արել սահմանափակել դեռահասներին նման բռնի տեսարաններից և բովանդակությունից, քանի որ նրանց հոգեկանը շատ փխրուն է: Նույնիսկ եթե դեռահասը ապրում է բարեկեցիկ ընտանիքում, նա կարող է ունենալ բարդույթներ կամ ինչ-որ բան, որի հետ  չի կարող հաշտվել, և ֆիլմերում դաժանության, բռնության ու այլասերվածության տեսարանները, ինչպես նաև նման տեղեկության տարածումը սոցիալական ցանցերում կարող են բացասաբար ազդել նրա հոգեկան աշխարհի վրա: