Հրատապ նիստ է հրավիրվել՝ Գորիս-Կապան մայրուղում թշնամական մաքսային կետեր տեղադրելու հարցով. Մանուկյան

«ԱԺ մարդու իրավունքների պաշտպանության հանձնաժողովը ժամը 14.00-ին հրավիրել է հրատապ նիստ»։ Այս մասին այսօր՝ նոյեմբերի 11-ին, կառավարության շենքի դիմաց բողոքի ակցիայի ժամանակ ասաց «Հայաստան» դաշինքի պատգամավոր Գեղամ Մանուկյանը:

Նրա խոսքով՝  հրատապ նիստում կքննարկվի երեկ կեսգիշերից ՀՀ սուվերեն տարածքում՝ Գորիս-Կապան մայրուղում թշնամական մաքսային և ոստիկանական հենակետեր տեղադրելու, ինչպես նաև այս իշխանության կողմից այդ ամենը թույլ տալու հարցերը։ Հատուկ հաշվետվության են կանչվել նաև կառավարության ներկայացուցիչներ։

«Այսօր նրանք ոստիկանական պատնեշով լավ 2-3 ժամ պաշտպանվեցին, բայց մեկ ժամ հետո, մեկ օր հետո, մեկ շաբաթ հետո այդ ամենը նորից նրանց առաջ է կանգնելու, նորից նրանց երեսին ամբողջ ճշմարտությունն ասվելու է»,- հայտարարեց Մանուկյանը։