ԱՄՆ-ից զենքի հինգերորդ խմբաքանակը հասել է Ուկրաինա

ԱՄՆ-ից բեռնատար ինքնաթիռը Ուկրաինա է տեղափոխել զենքի հինգերորդ խմբաքանակը, մասնավորապես՝ զինամթերք։ Այս մասին երկուշաբթի օրը հայտնել է Ուկրաինայի պաշտպանության նախարարության ղեկավար Ալեքսի Ռեզնիկովը։

«Հինգերորդ «թռչունը» Կիևում։ Եվս 84 տոննա տարբեր տրամաչափի զինամթերք»,- գրել է նա Twitter-ում՝ հավելելով, որ առաջիկա օրերին Ուկրաինան ակնկալում է ԱՄՆ-ից ստանալ «պաշտպանական զենքի» հերթական բեռը։

Ավելի քան 90 տոննա ընդհանուր քաշով ռազմական բեռների առաջին խմբաքանակը, ներառյալ զինամթերք, ԱՄՆ-ից Ուկրաինա է ժամանել հունվարի 22-ին։ Հաջորդ օրը Կիև է հասցվել երկրորդ բեռը՝ ավելի քան 80 տոննա կշռող ամերիկյան զենքով։ Երկու օր անց՝ հունվարի 25-ին, երրորդ ինքնաթիռն է ժամանել Ուկրաինա՝ մահաբեր զենքերով։ Կիևը հունվարի 28-ին ԱՄՆ-ից ստացել է ևս 81 տոննա տարբեր տրամաչափի զինամթերք։ Նշվել է, որ զենքի մատակարարումը տեղի է ունենում ԱՄՆ նախագահ Ջո Բայդենի վարչակազմի կողմից հաստատված 200 մլն դոլարի չափով Ուկրաինային օգնության շրջանակում։