Պուտինն ու Մակրոնը մեկ շաբաթվա ընթացքում երրորդ անգամ են զրուցել

Ռուսաստանի եւ Ֆրանսիայի նախագահներ Վլադիմիր Պուտինն ու Էմանուել Մակրոնը քննարկել են Ուկրաինայի շուրջ ստեղծված իրավիճակը։

Կրեմլի մամուլի ծառայությունը հայտնում է, որ կողմերը շարունակել են առարկայական երկխոսությունը Ուկրաինայի շուրջ ստեղծված իրավիճակի եւ Ռուսաստանի Դաշնության անվտանգության երկարաժամկետ իրավական երաշխիքներ մշակելու ռուսական նախաձեռնության հետ կապված հարցերի շուրջ։

«Առաջնորդները գնահատականներ են փոխանակել գործերի ներկա վիճակի վերաբերյալ, այդ թվում՝ հաշվի առնելով մի շարք միջազգային գործընկերների հետ վերջին շփումները, այդ թվում՝ նաեւ Եվրամիության խորհրդում Ֆրանսիայի նախագահության համատեքստում։ Վլադիմիր Պուտինը կրկին ուշադրություն է հրավիրել Կիեւի ղեկավարության սադրիչ հայտարարությունների եւ գործողությունների վրա, որոնք հակասում են մինսկյան պայմանավորվածություններին»,- նշվում է հաղորդագրության մեջ։