«Փելոսին իր խոսքով արդարացրեց Իրանի մտահոգությունները․ սա արկածախնդիր քայլ է, որին կուլ են գնում ՀՀ իշխանությունները»

Նախօրեին Գաֆեսճյան թանգարանում ցուցադրվող «Վարդանանց» մեծադիր կտավի առջև Նենսի Փելոսիի ակնարկը՝ պարսիկների դեմ «Քրիստոնյա Հայաստանի» պատերազմի մասին, հարուցել է Իրանի պաշտոնական շրջանակների (և ոչ միայն) վրդովմունքը։ ԱՄՆ-ի կողմից այսպիսի անհեռատես հայտարարություններն արդյո՞ք չեն վտանգում ոչ բարեկամ երկրներով շրջապատված ու պատերազմող Հայաստանի և բարեկամ Իրանի՝ առանց այն էլ վերջին շրջանում ոչ այնքան հարթ հարաբերությունները։

«Փելոսիի այդ ակնարկը լուրջ մտահոգություն է առաջացրել պետականամետ գործիչների և վերլուծաբանների մոտ, որովհետև նրանք գիտակցելով պահի լրջությունը, փորձում են զերծ մնալ էյֆորիկ և զգացմունքային պոռթկումներից և մտածել Հայաստանի ապագայի մասին, որտեղ Հայաստանի դարավոր և այժմ ամենահուսալի հարևանն ու պոտենցյալ դաշնակիցը համարվում է Իրանը, բայց, ցավոք, վերջին տարիներին ՀՀ իշխանությունները, իրենց գաղափարախոսությամբ և անհեռատես քայլերով չեն փորձել նախկինի համեմատ ավելի ճիշտ հարաբերություններ ստեղծել Իրանի հետ»: 

Այս մասին ԼՈՒՐԵՐ․com-ին ասաց իրանագետ Հարութ Արթին Առաքելյանը՝ նշելով, որ ՀՀ գործող իշխանությունների քարոզչամեքենա հանդիսացող լրատվականները փորձեցին պատերազմից հետո սևացնել Իրանին, հասարակության մեջ տարածել այն խոսույթը, որ Իրանը ոչինչ չարեց մեր երկրի համար ու դեռ շնորհավորեց Ադրբեջանին հողերը «ազատագրելու» կապակցությամբ:

«Այն, թե Իրանը ինչ է արել և անում Հայաստանի համար, ցավոք, այսօր չի լուսաբանվում, որովհետև դրանք գտնվում են հույժ կարևոր մակարդակում և բնականաբար դժվար է բացեիբաց խոսել դրանց մասին, բայց կարող եմ ասել, որ պատերազմից առաջ և հետո բազմաթիվ իրանցի զինվորական բարձրաստիճան պաշտոնյաներ այցելելով Հայաստան հստակ առաջարկներ են ներկայացել, որոնք անպատասխան են մնացել ՀՀ իշխանությունների կողմից, իսկ շնորհավորանքների մասին էլ պիտի ասեմ, որ դրանք պրոտոկոլային բնույթ են կրում և չի նշանակում, որ Իրանի պետությունը ուրախ էր Արցախի կորստով»,-նշեց մեր զրուցակիցը:

Ինչ վերաբերում է Նենսի Փելոսիի հայտարարությանը, ապա, ըստ իրանագետի, դա դիվանագիտական լեզվով պատգամ էր, թե ինչ նպատակ ունի իր այցից: 

«Հետաքրքրականն այն էր, որ ամիսներ շարունակ իրանական կողմը հենց դա է հայտարարում, որ Հայաստանում տիրող իրավիճակը և սահմաններին ընթացող պատերազմը ուղղված է հենց Իրանի դեմ: Փելոսին իր այդ խոսքով արդարացրեց Իրանի ունեցած մտահոգությունները: Սա արկածախնդիր քայլ է, որին կուլ են գնում ՀՀ իշխանությունները: Իրանը ազնիվ բարեկամ է, բայց բարեկամություն է անում ազնիվների հետ, եթե փորձենք նրանց հանդեպ խաղալ արկածախնդրությամբ ու կեղծավոր, հաստատ պատասխանը չի ուշանա: Ցավոք, Հայաստանում կան ուժեր, որոնք փորձում են դրսի գործակալական ծառայությունների հորդորով, խափանել Հայաստան-Իրան դիվանագիտական հարաբերությունները, որոնցից պիտի զգուշանանք և չեզոքացնել նման քայլերը»:

Արա Ալոյան