ՀԱՊԿ-ի դեմ ցույցերը բացասական արձագանք ունեն ՌԴ-ում. քաղտեխնոլոգ

«Հայաստանում ՀԱՊԿ-ի դեմ ցույցերը  բացասական արձագանք են թողնում ռուսական քաղաքական հասարակության շրջանակներում, ինչը արդեն տեսանելի է»,-ԼՈԻՐԵՐ.com-ի հետ զրույցում ասաց քաղտեխնոլոգ Արմեն Բադալյանը՝ անդրադառնալով ՀԱՊԿ-ի դեմ ցույցերին ՀՀ-ում:

«Նրանց կողմից վարվող տելեգրամ ալիքները խիստ բացասական հաղորդումներ են գրում այս ցույցերի մասին: Ռուսաստանի իշխանությունները բնական է դրանց մասին ոչինչ չեն ասում, փոխարենը իրենց կողմից աջակցություն ստացող տելեգրամ ալիքների, կայքերի միջոցով են են իրենց խիստ դժգոհությունը հայտնում»,-ասաց Բադալյանը:

Հայ-Ռուսական հարաբերությունները Բադալյանի կարծիքով այդքան էլ լավ վիճակում չեն այս պահին.

«Չէի ասի վատն են այս պահին, բայց սպասենք այդ հարաբերությունների ավելի սառեցմանը»:

Անդրադառնալով Փելոսիի այցին՝ Բադալյանը նշեց.

«Գաղտնիք չէ, որ Հայաստանի իշխանությունները 2018 թվականին հենց իշխանության եկել էին հենց այդ ուժերի, Արևմուտքի աջակցությամբ, որոնց ակտիվ ներկայացուցիչներից է հանդիսանում Փելոսին: Փելոսիի այցի մեսիջները մի քանիսն են: Առաջինը այն է, որ իրենք աջակցություն են հայտնում ՀՀ իշխանություններին, ոչ թե ՀՀ-ին, այլ իշխանություններին: Եթե իշխանությունը փոխվի, գան պրոռուսական ուժեր, բնականաբար նրանք Հայաստանին կաջակցեն քիչ չափով, բայց ՀՀ-ի իշխանություններին չեն աջակցի: Երկրորդը՝ գաղտնիք չէ, որ ընտրական կամպանիա է ԱՄՆ-ն սկսում, և քանի որ ներկայացուցիչների պալատի բոլոր ներկայացուցիչները ընտրվելու են, այդ թվում և Փելոսին, բնականաբար իրեն խիստ անհրաժեշտ է ԱՄՆ հայ համայնքի ներկայացուցիչների ձայները, որովհետև  ընտրությունների ժամանակ բոլոր ներկայացուցիչները իրենց ընտրատարածքի բոլոր ակտիվ գործոններից փորձում են  աջակցությունը ստանալ, այդ թվում էթնիկ խմբերի, իսկ հայերը՝ որպես էթնիկ խումբ, ԱՄՆ-ում բավականին ակտիվ են: Եվ երրորդը՝ Նենսի Փելոսին այն գործիչներից է, որը առիթը բաց չի թողնում ԱՄՆ-ի անձնական թշնամիներին  կամ հակառակորդներին, հանձինս Չինաստանի և Ռուսաստանի, անընդհատ քննադատելու: Չմոռանանք՝ Փելոսին այն գործիչն է, որ չնայած Չինաստանի մեծ դժգոհություններին, գնաց Թայվան, այնտեղ աջակցություն հայտնեց տեղի իշխանություններին, ինչը դուր չեկավ Չինաստանին, և նույնը հիմա կատարվում է Հայաստանում: Նա գալիս է Հայաստան, հանդիպում է ՀՀ իշխանություններին, շատ լավ հասկանալով, որ ՀՀ իշխանությունները այս պահի դրությամբ ՌԴ-ի կարծիքով ռուսական ազդեցության տարածք են, և շատ լավ հասկանում է, որ իր այցը բացասական կարող է ընկալվել ՌԴ-ի վերնախավի կողմից, բայց գալիս է և իր հակառուսականությունն է ցույց տալիս»:

Բադալյանի խոսքով՝ Փելոսիի այցից հետո ռուս-հայկական հարաբերություներում սառը ալիք անցավ.

«Եթե այցը ուներ նույն խնդիրները, ինչ նշեցի, հայ-ռուսական հարաբերությունները կմնան այն մակարդակին որ այժմ կա: Միգուցե մի աստիճան կամ ավելի քիչ սառի: Բայց եթե հարաբերությունները Փելոսիից հետո փոփոխությունների ենթարկվեն և հայ-ամերիկյան հարաբերությունները խիստ արագ տեմպերով զարգանան, և այցը նկատելի արդյունքներ տա, ապա այդ դեպքում բնականաբար սառնությունը շատ ավելի արագ ու լայն տեմպերով կզգացվի: Իսկ հիմա դա ուղղակի վատ նստվածք թողեց հայ-ռուս հարաբերություններում»: