Հայաստանը գնում է իր տարածքային ամբողջականությունը հասու բոլոր մեթոդներով պաշտպանելու ուղղությամբ. Ռուբեն Ռուբինյան

Հայաստանը շնորհակալ է ԱՄՆ Ներկայացուցիչների պալատի խոսնակ Նենսի Փելոսիից այս լարված ժամանակահատվածում կատարած այցի եւ իրերն իրենց անունով կոչելու ու օժանդակության համար: Այս մասին այսօր՝ սեպտեմբերի 19-ին, Հանրային հեռուստաընկերությանը տրված հարցազրույցում հայտարարեց ԱԺ փոխխոսնակ Ռուբեն Ռուբինյանը:

«Ագրեսորին զսպելու միակ միջոցը նրան հասցեական դատապարտելն է: Մենք պետք է շարունակենք մեր աշխատանքները բոլոր գործընկերների հետ մեր դիրքերն ու անվտանգությունն ուժեղացնելու համար: Հայաստանն աշխատում է իր բոլոր գործընկերների հետ՝ պաշտպանելու համար իր ինքնիշխանությունը: Հայաստանը գնում է իր ինքնիշխանությունը եւ տարածքային ամբողջականությունն իրեն հասու բոլոր մեթոդներով պաշտպանելու ուղղությամբ»,- ասաց Ռուբինյանը:

Անդրադառնալով Թուրքիայի փոխնախագահի հայտարարությանը, թե Հայաստանում Նենսի Փելոսիի արած հայտարարությունները կառուցողական չէին, Ռուբինյանը նշեց, որ Թուրքիայից հնչող որոշ հայտարարությունները չեն նպաստում տարածաշրջանային խաղաղությանն այս փխրուն իրավիճակում. «Հուսով եմ՝ այլ բնույթի հայտարարություններ կլսենք Թուրքիայից»:

Ռուբեն Ռուբինյանը հերքեց, թե Նենսի Փելոսիի այցը Հայաստանը հակաիրանական տարրեր էր պարունակում: «Ստեղծված իրավիճակում Իրանն այն պետություններից է, որն աներկբայորեն պաշտպանում է ՀՀ դիրքորոշումներն իր ինքնիշխանության եւ տարածքային ամբողջականության վերաբերյալ: Այստեղ ակնհայտ է, որ համընկնում են Հայաստանի եւ Իրանի շահերը: Եվ ակնհայտ է, որ տիկին Փելոսիի այցում չկար եւ չէր կարող լինել որեւէ կոնտեքստ ուղղված Իրանի դեմ: Դա առաջնահերթ մեր շահերից չի բխի»,- ընդգծեց ԱԺ փոխխոսնակը: