«Մի օր կարթնանանք ու կտեսնենք՝ «լավաշ»-ի իրավունքն էլ է ուրիշ երկիր վերցրել». Հարություն Մնացականյան

Գործարար Հարություն Մնացականյանը ֆեյսբուքյան իր էջում գրել է. «Աշխարհի կարգն է այսպիսին, հաջողության հասնելու համար կամ պիտի ունենաս քոնը, կամ ստեղծես քոնը և ստեղծածդ կամ ունեցածդ անպայման ամրագրես։ Խոշորից անցնենք մանր բաների։
Հոկտեմբերից վրացական կողմն արգելել է «աջիկա», «տղեմալի» մակնշումով այլ երկրների ապրանքների արտահանումն իր տարածքով, այսինքն մեր ոչ մի ընկերություն օրինակ ՌԴ և Եվրոպա չի կարող Վրաստանի տարածքով արտահանել աջիկա, տղեմալի և արդեն տևական ժամանակ է՝ մածուն, որոնց վրա մակնշված են այս անունները։ Ես վստահ եմ՝ ժամանակ է գալու՝ մի օր արթնանանք ու տեսնենք «լավաշ»-ի իրավունքն էլ է ուրիշ երկիր վերցրել և այդպես շարունակ։
Ի՞նչ է մնում մեզ...

Մեռնում եմ ասելով՝ ինչ ունենք, կամ հեղինակային իրավունք հանեք պետական մակարդակով, կամ ասոցիացիաների միջոցով, ինչն էլ արդեն կորցրել ենք, նոր անուն մշակեք, ամոթ է երբ դրսի շուկայում մեր մածունի վրա կարդան ոչինչ չասող горный йогурт, կամ Армянский йогурт եզրույթները։ Մրգօղիների մասին ասել եմ արդեն բազմիցս։ Մի հինգ տարի հետո ունենալու ենք տեղական արտադրանքներ, բայց միասնական անուն չենք ունենալու ու դա լուրջ խնդիրներ է առաջացնելու։
Կոնյակի դասը օրինակ չեղավ էլի, չեղավ ու վերջ»։