«Իրանի թշնամիները բորենիների նման սպասում են հարմար պահի». Փույա Հոսսեինի

«Հայաստան-Իրան զարգացման հիմնադրամ»-ի հիմնադիր Փույա Հոսսեինին ֆեյսբուքյան իր էջում գրել է. «Արդեն մի քանի շաբաթ է, ինչ իմ Մայր Հայրենիքում՝ Իրանում, հրդեհ է բռնկվել. շատ ցավալի իրադարձություններ, որոնց պատճառով խոր ցավ եմ ապրում: Նույն ցավն եմ ապրել և ապրում՝ իմ երկրորդ հայրենիք ու հարազատ դարձած Հայաստանում. Արցախի պատերազմում և դրան հաջորդած, Հայաստանի շուրջ կատարվող իրադարձությունների առիթով: Ավելի խոր ցավ է տեսնել թշնամիների քմծիծաղը, կամ կեղծ արցունքները՝ մեր երկրների համար: Միջազգային համայնք կոչվածը տարիներ շարունակ արհամարհում էր մարդկային կյանքը և ամենածանր ու անմարդկային պատժամիջոցներն էր դրել Իրանի ժողովրդի վրա, որը ծանր տնտեսական պայմաններում հազիվ գոյատևում էր: Օրինակ, անմարդկային պատժամիջոցներ էին սահմանված՝ դեղորայքի ներկրման վրա, որը հիվանդների բժշկական օգնության խնդիրները ավելի էր դժվարեցրել, և տասնյակ հազարավոր հիվանդների կյանքը վտանգի էր ենթարկել: Հիմա մարդու իրավունքների լացն են լացում, իբր Իրանի ժողովրդի համար անհանգստանում են: Մյուս կողմից, Իրանի թշնամիները բորենիների նման սպասում են հարմար պահի, որպեսզի անախորժ վիճակում կարողանան անջատողական ալիքներ բարձրացնեն Իրանում ու մասնատեն Իրանը, և օգտվելով ժողովրդի որոշ դժգոհություններից՝ թուլացնեն ու անկայունացնեն երկիրը, ի վերջո՝ ծնկի բերելով նրան:
Թող Աստված այս փորձություններից, որոնք եկել են Հայաստանի և Իրանի՝ երկու հարևան ու բարեկամ երկրների վրա, պահպանի հավերժ»: