«Հայաստան» խմբակցության «նոյեմբերյան թեզեր»-ում առհասարակ բացակայում են «պաշտպանություն», «պաշտպան» կամ «պաշտպանել» բառերը. Արմեն Այվազյան

«ՆՈՐԻՑ ԸՆԴԴԻՄՈՒԹՅԱՆ «ՆՈՅԵՄԲԵՐՅԱՆ ԹԵԶԵՐԻ» ՄԱՍԻՆ

Ս.թ. նոյեմբերի 5-ին կայացած հանրահավաքին պաշտոնական ընդդիմության «ռադիկալ թևի»՝ «Հայաստան» խմբակցության ներկայացրած փաշինյանական թեզերին անդրադարձել եմ իմ նախորդ գրառման մեջ (տե՛ս այստեղ)։

 

Իսկ այժմ՝ ամենակարևորի մասին։

Ինչու՞ հայ զանգվածները չեն միանում ընդդիմությանը, թեպետև Հայաստանի իրավիճակն օրհասական է և Փաշինյանն էլ վաղուց ի վեր ապացուցել է իր անհայրենասիրությունն ու անվտանգության հարցերում, մեղմ ասած, կատարյալ անձեռնհասությունը։ Ինչու՞ են ընդդիմության հանրահավաքները անհիշարժան և անարդյունք (եթե, իհարկե, արդյունք չհամարենք այն, որ դրանց ավանդական և հերթական տապալումներն ամեն անգամ նոր ու թարմ շունչ են հաղորդում Փաշինյանին՝ թուրքերին կատարվող կործանարար զիջումների իր քաղաքականությունն առաջ մղելու համար)։

Շրջանցելով մի շարք հանրահայտ պատճառները (օրինակ, հին առաջնորդներից ու նրանց կադրերից մարդկանց խոր հիասթափությունը), քննարկենք ուրիշ, ըստ իս, շատ ավելի ծանրակշիռ խնդիր։ Բանն այն է, որ 2020 թ. 44-օրյա պատերազմից ի վեր պաշտոնական ընդդիմությունը զլացել է ներկայացնել Հայաստանի պաշտպանական հայեցակարգի և ռազմական քաղաքականության իր ծրագիրը։ Բայց չէ՞ որ այսօր Հայաստանի ժողովրդին հուզող գլխավոր հարցը երկրի անվտանգությունն է, առաջին հերթին՝ ռազմական անվտանգությունը։

Պաշտոնական ընդդիմության «ռադիկալ թևը»՝ «Հայաստան» խմբակցությունը, նոյեմբերի 5-ի հանրահավաքում ներկայացրեց 8 ծրագրային «թեզ», որոնցից որևէ մեկը չի պատասխանում այն հարցին, թե իշխանության գալու դեպքում այդ քաղաքական ուժն ինչպե՞ս է պատկերացնում Հայաստանի պաշտպանության գործի կազմակերպումն ու բանակի վերակառուցումը (տե՛ս այստեղ)։

«Հայաստան» խմբակցության «նոյեմբերյան թեզեր»-ում առհասարակ բացակայում են «պաշտպանություն», «պաշտպան» կամ «պաշտպանել» բառերը։ Չկա «անվտանգություն» բառը։ Չկան «պահեստազոր» և «աշխարհազոր» բառերը։ Չկա «ազգ-բանակ» առանցքային եզրույթն ու հասկացությունը։ Քննադատության ու հիշատակման չեն արժանացած Փաշինյանի կառավարության՝ հայկական բանակը կազմալուծելու և այն փոքրաթիվ «պրոֆեսիոնալ բանակով» (իմա՝ առավելագույնը 10-15-հազարանոց թեթևազեն ուժերով) փոխարինելու վտանգավոր մտադրությունն ու ծրագրերը, որ մտածել է տալիս, թե խորհրդարանական ընդդիմությունը դրանց առնվազն դեմ չէ։ Բանակ բառը նշվում է ընդամենը մեկ անգամ, երբ հպանցիկ նշվում է, թե պետք է «վերականգնենք բանակը»՝ առանց պարզաբանելու, թե ռազմական քաղաքականության ո՞ր և ինչպիսի՞ հայեցակարգի հիման վրա։

Փոխարենը 8 անգամ գործածված «բանակցել», «բանակցող» և «բանակցային» բառերով շեշտվում են ընդդիմության՝ Հայաստանի անվտանգությունը միջազգային երաշխիքների հիման վրա կառուցելու մտադրությունները։ Եվ սա այն դեպքում, երբ հայ-ադրբեջանական հակամարտության շրջանակներում միջազգային երաշխիքների անարժանահավատությունն արդեն իսկ լիուլի ցուցադրվել է, իսկ Ալիևը թքած ունի Հայաստանի հետ լրջորեն բանակցելու վրա։ Արտաքին միջամտություններին ապավինելու և հայ ժողովրդի սեփական ներուժին չվստահելու ընդդիմության այս մոտեցումները մեծապես նմանվում են փաշինյանական խունտայի վարած ներկա քաղաքական ուղեգծին։

Այս ամենից պետք է եզրակացնել, որ խորհրդարանական ընդդիմությունը դեմ է «ազգ-բանակ» հայեցակարգին։ Այնինչ միմիայն ազգ-բանակն է ի վիճակի լինելու ապահովել Հայաստանի անվտանգությունն ի դեմս ադրբեջանական շարունակվող ագրեսիայի, ինչպես նաև իր բարձրագույն դիմադրողականությամբ վաստակելու իրական դաշնակիցներ՝ թուրքական վտանգը չեզոքացնելու համար։

Հիշեցնեմ, որ «ազգ-բանակ» հայեցակարգը նշանակում է ՄԵԾԱՔԱՆԱԿ ՄԱՐՏՈՒՆԱԿ ԲԱՆԱԿ + ԳԼԽՈՎԻՆ ԶԻՆՎԱԾ ԺՈՂՈՎՈՒՐԴ (պահեստազորի և աշխարհազորի տեսքով)։

Սրան այլընտրանք չկա. եթե այս ուղին չընտրեցինք, ապա ինքներս մեզ դնելու ենք նորանոր տարածքային կորուստների, հայաթափումների ու կոտորածների առջև։ Պատերազմը չի ավարտվել։ Հայաստանը պետք է պատրաստ լինի լայնածավալ պատերազմի ու հե՛նց դա էլ այդ պատերազմը կանխելու միակ ձևն է։

Հետևաբար, կրկնեմ.

ՀԱՅԱՍՏԱՆԻՆ ՊԵՏՔ ԵՆ ՈՒՐԻՇ ԱՌԱՋՆՈՐԴՆԵՐ ԵՎ ՈՒՐԻՇ ԸՆԴԴԻՄՈՒԹՅՈՒՆ

 

Հ.գ. Այս հարցերի մասին ավելի մանրամասն խոսել եմ, մասնավորապես, հետևյալ նյութերում՝

1. «Հայաստանին փրկելու է ոչ Պուտինը, ոչ Մակրոնը, այլ մեծաթիվ մարտունակ բանակն ու գլխովին զինված ժողովուրդը»

2. "НАС СПАСУТ ЛИШЬ БОЕСПОСОБНАЯ АРМЯНСКАЯ АРМИЯ И ПОГОЛОВНО ВООРУЖЕННЫЙ НАРОД"

3. Ընդդիմության կրավորականություն այս հարցերում նշել եմ բազմիցս, օրինակ, այստեղ՝ https://www.facebook.com/permalink.php?story_fbid=pfbid02JJ2h1j8E3DSKkqegVu3mCPpwAazrXzUcyLRgXo3rtdyxXMxDL85HSGJ7tjVvq2fcl&id=100015837611475»: