Ընդդիմադիր Փաշինյանի մոռացված քննադատությունը. Նոր Հայաստանում կրկին «կռուտոյ» պաշտոնյանե՞ր կան

2015-ի բյուջեի քննարկման ժամանակ, այն ժամանակ ՀԱԿ խմբակցության պատգամավոր Նիկոլ Փաշինյանը հայտարարություն արեց. «Արդեն երեք տարի է՝ ես տեսնում եմ ԱԺ նախագահի ստորագրած կարգադրությունը՝ ԱԺ մշտական հանձնաժողովներում ՀՀ պետբյուջեի քննարկումների մասին ժամանակացույց, որտեղ գրված է, որ այսօրվա քննարկմանը հրավիրված են Երեւանի քաղաքապետ Տարոն Մարգարյանը եւ ՀՀ մարզպետները: Ես երեք տարի է՝ ոչ մի տարի չեմ տեսել Տարոն Մարգարյանին եւ Սյունիքի մարզպետ Սուրիկ Խաչատրյանին: Սա ի՞նչ է նշանակում: Ամենակրուտոյ պաշտոնյաները չե՞ն գալիս այսպիսի ոչ պրիստիժնի տեղեր, գալիս են առավել ոչ արտոնյալնե՞րը: Նրանք, ովքեր պատմագիտության դոկտորի կոչում ունեն, նրանց հարմար չէ՞ այսպիսի քննարկումների մասնակցել: Ասում են՝ Տարոն Մարգարյանը կարեւոր գործ ունի, այսինքն, մենք այստեղ հավաքվել ենք ոչ կարեւոր գործերո՞վ: Ես հիմա շատ կարեւոր գործեր ունեմ, ինչպես Տարոն Մարգարյանը եւ Սուրիկ Խաչատրյանը: Երբ նրանք կներկայանան, իմ հեռախոսահամարն ունեք, կզանգեք, ես կներկայանամ այս քննարկմանը»: Նա ցտեսություն ասաց եւ արդյունավետ քննարկում մաղթեց պետական կառավարման ոլորտում»:

Այս օրերին ԱԺ-ում տեղի են ունենում Բյուջե 2023-ի քննարկումները, որոնց ընթացքում ՔՊ-ականները՝ Նիկոլ Փաշինյանի թիմակիցները, մեղմ ասած, աչքի չեն ընկնում ակտիվությամբ: Թերեւս, կարելի է մատնանշել ՔՊ-ական պատգամավորներ Հովիկ Աղազարյանին եւ Սերգեյ Բագրատյանին, որոնք ավանդաբար ակտիվ էին եւ գրեթե բոլոր զեկուցողներին հարցեր էին ուղղում:  Սյունիքի մարզպետ Ռոբերտ Ղուկասյանը եւ Լոռու մարզպետ Արամ Խաչատրյանն առհասարակ նիստին չէին ներկայացել, եւ հանձնաժողովի նախագահ Վահե Ղալումյանի մտքով էլ չանցավ հետաքրքրվել, թե որն է նրանց՝ խորհրդարան չգալու պատճառը: Բացառությամբ չորեքշաբթի օրվա, երբ խորհրդարան էր եկել վարչապետ Նիկոլ Փաշինյանը, մյուս բոլոր օրերին Ազգային ժողովի 334 սրահում, որտեղ որ անցկացվում են քննարկումները, մատների վրա հաշված պատգամավորներ են եղել։ Դահլիճում ներկա պատգամավորների թիվն այս օրերին 6-ը չի գերազանցել, այնինչ «Քաղաքացիական պայմանագիրն» ԱԺ-ում 71 պատգամավոր ունի։ 

Հետաքրքիր է` իսկ ինչու այսօր Նիկոլ Փաշինյանը նույն ջանասիրությամբ և հռետորաբանությամբ չի քննադատում արդեն իր թիմակիցներին և չի հետաքրքրվում, թե այդ ինչ կարևոր գործեր ունեին վերջիններս, որոնք ավելի կարևոր էին, քան բյուջեի քննարկումները: Ստացվում է՝ իրենց ՔՊ-ականներին արդեն կարելի է այն, ինչ չէր կարելի ՀՀԿ-ականներին...