Կինը շեֆից գողացել է 100 հազար ֆունտ արժողությամբ արջուկներ

Մեծ Բրիտանիայի Սթաֆորդշիր կոմսության Թամվորթ քաղաքում մոլախաղերից կախվածություն ունեցող կինը իր ղեկավարից գողացել է ավելի քան հազար թանկարժեք խաղալիք արջուկներ՝ դրանք վաճառելու համար: Այս մասին հայտնում է Daily Mail-ը։

51-ամյա Լիզա Նորիեգան 14 տարի աշխատել է ձեռնարկատեր Ջոն Ռիչարդսին պատկանող ընկերություններում։ Մասնավորապես, կինը Cheshire Bear ընկերության աշխատակից էր, որը վաճառում է Charlie Bears ապրանքանիշի կոլեկցիոն արջուկներ։ COVID-19 համաճարակի սկսվելուց հետո մենեջերը Նորիեգային թույլ է տվել շարունակել աշխատել լրիվ դրույքով, չնայած նա և մի քանի այլ աշխատակիցներ մնացել են առանց աշխատավարձի։

Լոքդաունի ընթացքում բրիտանուհին կախվածություն է ձեռք բերել առցանց մոլախաղերից: Նոր հոբբին ֆինանսական ռեսուրսներ էր պահանջում և ստիպել է նրան գողության դիմել. նա ընկերությունից գողացել է արջուկների հավաքածու և այն չնչին գումարի դիմաց վաճառել eBay-ում՝ օգտագործելով իր նախկին ամուսնու հաշիվը: Այն պահին, երբ ընկերության ղեկավարությունը հայտնաբերեց գողությունը, անհետացել էին 100 հազար ֆունտ արժողությամբ արջուկներ: Դրանց թվում էր արջերի մի շարք՝ նվիրված «Աստղային պատերազմներ» մեդիա ֆրանշիզին:

Դատարանում բրիտանացի փաստաբան Օլիվեր Քինգը նշել է, որ անհրաժեշտ է հաշվի առնել անձնական հանգամանքները, որոնցում կինը կատարել է գողությունը։ Ամուսինը, ում հետ նա տուն ուներ, թողել է նրան, իսկ միակ դուստրը հեռացել համալսարանում սովորելու։ «Նա երկար ժամանակ մենակ է նստել տանը և համաճարակի պատճառով չի կարողացել այցելել դստերը։ Դա ստիպելէ նրան իրեն շատ միայնակ և մեկուսացված զգալ։ Այդ ժամանակ նա բացահայտել է առցանց մոլախաղերը: Նա սկսել է փոքր խաղադրույքներից, բայց ժամանակի ընթացքում դա սովորություն է դարձել, քանի որ թույլ է տվել նրան մի փոքր ավելի լավ զգալ ներկա իրավիճակում», - ասել է նա:

Քինգն ընդգծել է, որ կինը խորապես ամաչում է իր արածի համար։ Նա նույնիսկ ցանկացել է վաճառել տունը՝ Ռիչարդսի վնասը փոխհատուցելու համար, սակայն չի կարող դա անել, քանի որ տան մի մասը պատկանում է նախկին ամուսնուն։ Քինգն ընդգծել է, որ բրիտանուհին փորձում է ուղղվել։

Նորիեգայի գործողությունների արդյունքում ընկերությունն այնպիսի ծանր վնաս է կրել, որ Ռիչարդսը ստիպված է եղել փակել ստորաբաժանումներից մեկը։ Դատարանը բրիտանուհուն դատապարտել է մեկ տարվա ազատազրկման։