Գերմանիայում թոշակառու զույգն իրենց թոռնուհուն 8 տարի փակի տակ են պահել
ԱյլԳերմանիայում իրավապահները հայտնաբերել են 8-ամյա աղջկա, ով գրեթե ողջ կյանքն անցկացրել է փակի տակ։ Այս մասին հայտնում է The Guardian-ը։
Աղջիկը, որին տեղական լրատվամիջոցները կոչում են «Մարիա» մականունով, լույս աշխարհ գալուց հետո բաժանվել է հորից։ Երբ աղջիկը մոտ վեց ամսական էր, մայրը գրություն է թողել երեխայի հորը, որտեղ գրել է, որ պատրաստվում է դստեր հետ տեղափոխվել Իտալիա։
2015 թվականի սեպտեմբերին տղամարդն Ատենդորնում մի քանի անգամ տեսել է կնոջն ու երեխային և այդ մասին հայտնել խնամակալության մարմիններին: Ծառայության աշխատակիցները հարցաքննել են գերմանուհու ծնողներին, սակայն նրանք հաստատել են, որ մայրն ու աղջիկը լքել են Գերմանիան։
Իրավապահները մի քանի տարի շարունակ փորձում էին գտնել աղջկան և նրա մորը, սակայն երեխայի հետքը կարողացել են գտնել միայն 2022 թվականին։ Պարզվել է, որ աղջիկը երբեք չի հատել երկրի սահմանները և այդ ամբողջ ընթացքում եղել է տատիկի ու պապիկի կողքին։ Պարզվել է, որ երեխան երբեք դուրս չի եկել հարազատների տանից։
Բուժզննման ընթացքում բժիշկները ֆիզիկական բռնության կամ թերսնման հետքեր չեն արձանագրել։ Սակայն աղջիկը ֆիզիկապես թույլ է և չի կարողանում ինքնուրույն բարձրանալ աստիճաններով։
Այս պահին երեխայի մայրը, տատիկն ու պապիկը մեղադրվում են անչափահասի ապօրինի ազատազրկման և նրա նկատմամբ դաժան վերաբերմունքի մեջ։ Թե ինչու են ամբաստանյալներն այսքան տարի երեխային պահել փակի տակ, հայտնի չէ։