Ինչպես կարձագանքի Մոսկվան՝ իր ուղղությամբ Փաշինյանի նետած հերթական «քարին»

Այսօր կառավարության նիստի ընթացքում վարչապետ Նիկոլ Փաշինյանը հայտարարել է, որ Ադրբեջանը չի կատարում Սոչիում ստանձնած պարտավորությունները: Ըստ էության, սա Փաշինյանի հերթական քարն է ուղղված Մոսկվային, քանի որ Սոչիի հանդիպման արդյունքներով ընդունված հայտարարության տակ որպես այդ հայտարարության մեջ տեղ գտած պարտավորությունները ի կատար ածելու գարանտն է հենց Մոսկվան: 

Փաշինյանի այս հայտարարությունը ավելի ուշագրավ է դառնում երեկ ՌԴ ԱԳՆ խոսնակ Մարիա Զախարովայի արած հայտարարության ֆոնին: Հիշեցնենք, որ վերջինս նշել էր, թե Սոչիում եռակողմ հանդիման ավարտին ընդունած պայմանավորվածությունները պահպանվում են և իրենք Մոսկվայում չեն տեսնում դրանք խախտելու միտում:

Փաստացի Փաշինյանը իր այս հայտարարությամբ հերքում է Մարիա Զախարովային և կասկածի տակ դնում Մոսկվայի միջնորդական ջանքերի արդյունավետությունը:

Փաշինյանի այս ելույթից ժամեր առաջ էլ խոսել էր վարչապետի խոսնակ համարվող Էդմոն Մարուքյանը: Վերջինս, մասնավորապես, ասել էր, որ կա վտանգ, որ Ադրբեջանը չի կատարի նաև ստորագրվելիք խաղաղության պայմանագրում նախատեսվող դրույթները և Հայաստանին այս առումով գարանտ է հարկավոր, ցանկալի է ՄԱԿ ԱԽ անդամ: Կարելի է ենթադրել, որ Փաշինյանը մի կողմից կասկածի տակ է դնում Մոսկվայի՝ Բաքվին համոզելու և սեփական առաջարկների կատարմանն ու իրագործմանը հասնելու ունակությունը, մյուս կողմից Մարուքյանի շուրթերով ակնարկում է, որ ցանկալի է այդ գարանտը լինի արևմտյան երկրներից որևէ մեկը: Եվ այս հայտարարությունը արվում է այս ամիս Բրյուսելում սպասվող եռակողմ հանդիպմանն ընդառաջ: Ինչպես տեսնում ենք, Փաշինյանը հերթական անգամ ռևերանս է անում Արևմուտքին, գնդակը այլևս Մոսկվայի դաշտում է...