Փաշինյանն իր իսկ «աճեցրած» օլիգարխի լոբբինգո՞վ է զբաղվում

Վարչապետ Նիկոլ Փաշինյանի ներկա է գտնվել Կոտայքի մարզի Եղվարդ համայնքում հիմնված համակցված կերերի նոր գործարանի բացման արարողությանը: Միջոցառմանը ներկա են եղել փոխվարչապետ Համբարձում Մաթևոսյանը, Էկոնոմիկայի նախարար Վահան Քերոբյանը և այլ պաշտոնատար անձինք:

Իսկ ուշագրավն այստեղ այն է, որ մամուլի տեղեկությունների համաձայն` նման խոշորածավալ նախագիծը իրականացվել է «Պրոյեկտ ինտեր-ինվեստ» ընկերությունների խմբի սեփականատեր Նարեկ Նալբանդյանի ներդրումների շնորհիվ, որն, ի դեպ, նաև Ծաղկաձորի «Գոլդեն փելես» (Golden Palace) հյուրանոցի գնորդն է: 

Հեղափոխությունից առաջ Նիկոլ Փաշինյանը մեղադրում էր Սերժ Սարգսյանին այսպես ասած` սեփական օլիգարխներ աճեցնելու և մոնոպոլիստներ ստեղծելու մեջ, իսկ այսօր, կարծես թե, այդ նույն գործելաոճը որդեգրել է նաև ինքը՝ Փաշինյանը: Ամեն դեպքում, տարակուսելի է, որ երեք տարի շարունակ չվաճառվող հյուրանոցը վերջապես գնորդ է գտնում, այն էլ՝ 5 միլիարդ դրամով և դրանից անմիջապես հետո հյուրանոցը գնած անձին պատկանող թռչնաֆաբրիկան որոշակի դեմպինգային վարք է սկսում դրսևորել ձվի շուկայում և պլստում է ընդամենը 3 միլիոն դրամի չափով տուգանք մուծելով։ Իսկ այժմ էլ անձամբ Փաշինյանը և մի շարք բաձրաստիճան պաշտոնյաներ մասնակցում են վերջինիս բիզնեսի լոբինգին:

Սա, ի դեպ, ՀՀ երրորդ նախագահ Սերժ Սարգսյանին բնորոշ գործելաոճ էր, նա նույնպես հաճախ այցելում էր այս կամ այն ՀՀԿ-ական օլիգարխի նորաբաց գործարան և դրանով իսկ նպաստում վերջինիս փիառին: Այդ գործելաոճը քննադատում էին այն ժամանակվա ընդդիմադիրները, ովքեր այսօր իշխանության են և, կարծես թե, որևէ խնդիր չեն տեսնում արդեն իրենց իսկ աճեցրած օլիգարխների բիզնեսը լոբբինգ անելու մեջ...