Ալիևը խոսել է Ադրբեջանից դուրս ապրող «40 միլիոն ադրբեջանցիների» իրավունքների մասին

Ադրբեջանի նախագահ Իլհամ Ալիևը, այսօր՝ նոյեմբերի 11-ին, Սամարղանդում ելույթ ունենալով Թյուրքական պետությունների կազմակերպության IX գագաթնաժողովում, հերթական անգամ անուղղակի կերպով Իրանին մեղադրել է ադրբեջանցիներին ճնշելու մեջ։

Իր ելույթում Ալիեւը հայտարարել է, որ ադրբեջանական պետությունից դուրս ապրող 40 միլիոն ադրբեջանցիների մեծ մասը զրկված է մայրենի լեզվով սովորելու հնարավորությունից։

«Կարծում եմ, որ եկել է ժամանակը, երբ անհրաժեշտ է կազմակերպությունում մշտական ​​ուշադրության ներքո պահել Թյուրքական պետությունների կազմակերպության անդամ երկրներից դուրս ապրող հայրենակիցների իրավունքները, անվտանգությունը, ազգային ինքնության պաշտպանությունը, որպեսզի նրանք չենթարկվեն ասիմիլյացիայի։ Այն երկրներում, որտեղ ապրում է երիտասարդ սերունդը, դպրոցները պետք է կարողանան դասավանդել իրենց լեզվով: Ցավոք, ադրբեջանական պետությունից դուրս ապրող 40 միլիոն ադրբեջանցիների մեծ մասը զրկված է այդ հնարավորություններից»,- ասել է Ալիեւը։

Նշենք, որ Բաքվի քարոզչությունն այն է, որ Իրանում ապրում է ավելի քան 30 միլիոն ադրբեջանցի, մինչդեռ նրանց ներկայիս թիվը մոտ 10 միլիոն է։ Բաքուն և Անկարան իրենց հերթին ակտիվորեն քարոզում են պանթյուրքիստական ​​գաղափարախոսությունը Իրանի թյուրքալեզու բնակչության շրջանում։

Հատկանշական է նաև, որ Ադրբեջանն ինքն է վարում իր երկրում բնիկ ժողովուրդների ձուլման քաղաքականությունը՝ արգելելով ոչ միայն լեզուն, այլև ազգային ինքնության ցանկացած այլ դրսեւորում։