Իրանն ու Ադրբեջանը բարեկամ երկրներ են, չափազանցությունների գիրկը մի ընկեք. վարչապետ
Արտաքին ՔաղաքականԵՄ դիտորդական առաքելության ներկայությունը Հայաստանում որեւէ անհանգստություն չի առաջացնում Իրանի Իսլամական Հանրապետությունում: Այս մասին այսօր՝ նոյեմբերի 11-ին, Հանրային հեռուստաընկերության հետ հարցազրույցում ասաց վարչապետ Նիկոլ Փաշինյանը:
«Իմ եւ Իբրահիմ Ռայիսիի հետ հանդիպմանը նման հարց չի բարձրացվել: Ըստ էության, Արեւմուտքը Հայաստանի Հանրապետությունում միշտ էլ ներկա է եղել: Ես կարծում եմ, որ մեր տված պարզաբանումները բավարար են Իրանի համար: Ես տպավորություն չստացա, որ քաղաքացիական առաքելության ներկայությունն Իրանում որեւէ անհանգստություն է առաջացնում: Այլ դերակատարների ներկայությունն է անհանգստացնում Իրանին մեր տարածաշրջանում, եւ այդ դերակատարներն ամենեւին էլ Հայաստանի Հանրապետության տարածքում չեն»,- նշեց նա:
Նիկոլ Փաշինյանը կրկին կարեւորեց եւ բարձր գնահատեց ԵՄ դիտորդական առաքելության ներկայությունը: Նրա խոսքով՝ դիտորդների առաքելության բուն նպատակը կրակոցների մասին ամենօրյա հայտարարություններ անելը չէ:
«Կարծում եմ, որ իրենք ավելի խորը հետեւություններ պետք է անեն եւ դրանք փոխանցեն դելիմիտացիայի գործընթացում ներգրավված պաշտոնյաներին եւ միջազգային հանրությանը: Վստահ եմ, որ այդ հետեւությունները կլինեն օբյեկտիվ: Իրենք հրադադարի ռեժիմի մոնիտորինգ չեն իրականացնում, իրենց առաքելության իմաստն առավել խորն է»,- ասաց Փաշինյանը:
Նիկոլ Փաշինյանի դիտարկմամբ՝ Իրանը եւ Ադրբեջանը շատ խոր մշակութային եւ տնտեսական կապերով իրար կապված բարեկամական երկրներ են, որոնք կարող են բանավիճել, սակայն դրանցում պետք չէ չափազանցություններ փնտրել:
«Իրանի Իսլամական Հանրապետությունը միջազգային եւ տարածաշրջանային քաղաքականության մեջ շատ կարեւոր դերակատար է, եւ մենք շատ սերտ համագործակցության մեջ ենք Իրանի մեր գործընկերների հետ: Շատ կարեւոր մանրուքներ կան, եւ շատ կարեւոր է, որ հաղորդակցության մեջ հնչեն հարցեր եւ պատասխաններ: Մեզ համար շատ կարեւոր է հարաբերությունների զարգացումը, եւ մենք գնում ենք այդ ճանապարհով»,- ընդգծեց նա:
Փաշինյանի խոսքով՝ այն էլեկտրագծերը, որոնք կան Հայաստանի եւ Իրանի միջեւ, ծանրաբեռնված են, անհրաժեշտություն կա երրորդ էլեկտրագծի:
«Մենք Իրանից գազ ենք վերցնում, էլեկտրաէներգիա ենք արտադրում եւ այդ էլեկտրաէներգիան վերադարձնում ենք իրենց: Որպեսզի մենք ավելի շատ գազ կարողանանք սպառել էլեկտրաէներգիա արտահանելու համար, պետք է ավելի շատ դեպի Իրան արտահանելու հնարավորություն ունենանք, իսկ այդ հնարավորությունը մենք կստանանք երրորդ էլեկտրագծի շինարարության ավարտից հետո»,- ասաց Նիկոլ Փաշինյանը:
ՈՒՂԻՂ ԵԹԵՐ
Ամենադիտված 
Ադրբեջանից ներմուծված բենզինը պետք է մնա բենզալցակայաններում, չպետք է օգտվեն դրանից (տեսանյութ)
