Գարիկ Սարգսյանի «կայսերական» ծրագրերը գրվեցին սառույցին

Մի քանի ամիս առաջ Վեդի համայնքի ղեկավար ընտրվեց Գարիկ Սարգսյանը, ով նախընտրական խոստումների մի աստղաբույլ էր հնչեցրել: Ամիսներ անց հայացք գցելով Սարգսյանի տված և կատարված խոստումների վրա՝ կարող ենք փաստել, որ ինչպես և մարզպետի պաշտոնում, այնպես էլ համայնքապետի պաշտոնում Սարգսյանը չի շտապում ի կատար ածել իր կայսերական ծրագրերը:

Եվ այսպես ինչ էր խոստանում Սարգսյանը վեդեցիներին՝ ներդրումներ, նոր աշխատատեղեր, համայնքի կայուն զարգացում, նորարարական մոտեցումներ, կենցաղային խնդիրների լուծում;

Այժմ տեսնենք, թե ինչով է ըստ Վեդու համայնքապետարանի զբաղված համայնքի ղեկավարը: Դիցուք՝ նշել են տարեցների միջազգային օրը, ուսուցչի տոնն են շնորհավորել, բերքահավաք են կազմակերպել, երիտասարդների միջազգային օրն են նշել, Վարդավառի տոնը, «Իմ քայլը» հիմնադրամի գովազդն են արել, Արարատյան փողոցի այրված լուսատուներն են փոխել, Գոռավանի կամուրջի տակ գտնվող խողովակն են մաքրել, անվճար միջհամայնքային երթուղի են ներդրել, որը թերևս միակ պիտանի գործն է որ կատարել է համայնքապետարանն այս ողջ ընթացքում:

Այսքանով, թերևս, կարելի է սպառված համարել Գարիկ Սարգսյանի կայսերական խոստումների իրագործումը, քանի որ, ինչպես տեսնում ենք, վերը նշված ցանկում կայսերական ոչինչ չկա: Թե ուր մնացին աշխատատեղերի, հորդացող ներդրումների մասին տեղեկությունները՝ մնում է գուշակել...