Քրդական երաժշտությունն արգելված է «մեր քաղաքացիների ապրելակերպը պաշտպանելու համար». Թուրքիայի ՆԳ նախարար

Թուրքիայի տեղական ինքնակառավարման մարմինների պաշտոնյաները հրաժարվել են քուրդ երաժիշտներին կատարման թույլտվություն տալ՝ ելնելով անվտանգությունից և «քաղաքացիների կենսակերպը» պաշտպանելու համար, ասել է Թուրքիայի ներքին գործերի նախարար Սուլեյման Սոյլուն։

«Այդ որոշումներն ընդունվել են ոչ թե ապրելակերպին միջամտելու, այլ մեր քաղաքացիների ապրելակերպն ու անվտանգությունը պաշտպանելու համար»,- հինգշաբթի օրը Սոյլուի խոսքերն է մեջբերում «Duvar» լրատվական կայքը։ Թուրք նախարարի պատասխանի մեծ մասը կազմված է եղել օրենքի մեջբերումներից։

Հարցումը տվել է գլխավոր ընդդիմադիր Ժողովրդահանրապետական ​​կուսակցության պատգամավոր Սեզգին Թանրըքուլուն, ով էթնիկ քուրդ է։ Թանրըքուլուն հարցրել է, թե ինչո՞ւ վերջին վեց տարիներին թույլ չեն տվել երգել միջազգային ճանաչում ունեցող երաժիշտներին, ինչպիսիք են Փերվին Չաքարը, Այնուր Դողանը և Մեմ Արարատը։

Այս տարվա մայիսին Թուրքիայի հյուսիս-արևմտյան Քոջաելի նահանգում Այնուր Դողանի համերգը չեղարկվել էր տեղի քաղաքապետարանի կողմից և իշխող «Արդարություն և զարգացում» կուսակցության կողմից որակվել էր որպես «անտեղի»։