Թուրքիայի համար ավելի հեշտ կլինի, եթե ԱՄՆ ընտրություններում հաղթեն հանրապետականները․ Էրդողան

Թուրքիայի իշխանությունների և դիվանագետների համար ավելի հեշտ կլինի աշխատել, եթե հանրապետականները հաղթեն ԱՄՆ Կոնգրեսի ընտրություններում, նոյեմբերի 12-ին ասել է Թուրքիայի նախագահ Ռեջեփ Թայիփ Էրդողանը Ուզբեկստան կատարած այցից հետո ինքնաթիռում լրագրողների հարցերին պատասխանելիս։

«Ներկայացուցիչների պալատում հանրապետականներն ավարտեցին մեծ տարբերությամբ, բայց այժմ, իհարկե, կա Սենատը։ Սենատում երկու կամ երեք տեղերը նշանակալի են։ Այսինքն, եթե հանրապետականները հաջողությամբ զբաղեցնեն այդ երկու-երեք մանդատները, գուցե մեզ համար շատ ավելի հեշտ լինի աշխատել։ Հիմա մենք հետևում ենք այս գործընթացին»,- ասել է Էրդողանը։

Նա նաեւ նշել է, որ ԱՄՆ խորհրդարանում ուժերի հարաբերակցության փոփոխությունից հետո Թուրքիան դրական նորություններ է ակնկալում Թուրքիային F-16 կործանիչների մատակարարման հետ կապված։