Բժիշկները կնոջ ձեռքին քիթ են աճեցրել (լուսանկար)

Ֆրանսիական Թուլուզ քաղաքի բնակչուհին քաղցկեղի բուժման կուրս անցնելուց հետո նոր քիթ է աճեցրել նախաբազկի վրա։ Նշվում է, որ նա քաղցկեղի պատճառով կորցրել է դեմքի մի մասը։ Այս մասին հայտնում է Daily Star-ը։

Կնոջ մոտ, ում անունը չի նշվում, քթի քաղցկեղ է ախտորոշվել։ 2013 թվականին նա քիմիոթերապիայի և ճառագայթային թերապիայի է ենթարկվել։ Հյուծիչ բուժման արդյունքում ֆրանսուհին կորցրել է դեմքի զգալի մասը, այդ թվում՝ քիթը։

Բժիշկները մի քանի անգամ փորձել են վերականգնել հիվանդի քիթը, սակայն բուժումն անհաջող է անցել։ Կինը խորհրդակցել է մասնագետների հետ, և որոշվել է փորձել նոր ճանապարհ՝ ժամանակակից բժշկական տեխնոլոգիաների միջոցով կնոջ ձեռքին նոր քիթ է աճեցվել, ապա փոխպատվաստվել նրա դեմքին։

Բժիշկները 3D տպիչի վրա ստեղծել են նոր քթի ձև և տպել կենսանյութը, որն այնուհետև տեղադրել են հիվանդի նախաբազուկին: Արհեստական ​​կռճիկն ունի բնական կռճիկի բոլոր հատկություններն ու ձևը: Մասնագետները ֆրանսուհու քունքից մաշկի տրանսպլանտատ են վերցրել և օգտագործել նոր քիթ ստեղծելու համար։

Դրանից հետո կնոջ թեւին երկու ամիս նոր քիթ է աճել, որից հետո այն հանել են և փոխպատվաստել նրա դեմքին։

Թուլուզի համալսարանական հիվանդանոցի և Կլաուդիուս Ռեգո ինստիտուտի վիրաբույժները կիրառել են բարդ տեխնոլոգիա՝ ձեռքի արյունատար անոթները դեմքի անոթներին միացնելու համար: Վիրահատությունը հաջող է անցել, և հիվանդը նոր քիթ է ստացել։ Դրանից հետո նա երեք շաբաթ հակաբիոտիկներ է ընդունել:

Նման վիրահատություն առաջին անգամ է կատարվում։ Դեռ հայտնի չէ՝ հիվանդը կկարողանա՞ նոր քթով հոտ զգալ։